Hmeichhe World Cup Australia-in Brazil an barakhaih

Pathianni zan hmei­chhe World Cup second round-ah Australia-in champion tura rinkai zinga mi Brazil an barakhaih a, 1-0 a hnehna changin quarterfinal an lut.

Inkhel ṭan tirh aṭangin Australia-in beisei aiin an khel ṭha a, Samantha Kerr chuan an hmahruaina goal a khung teuh hle. Goal lut awm loin chawlhlawk an hmang a, second-half-ah Brazil an hlauhawm.

Brazil tana goal khung theihna hun ṭha nei For­miga-i'n goal post a tauh per a, Australia defender te thin a ti phu. Mahse, beisei loh taka goal khungtu erawh Australia an ni. Hun tawp nan minute sawm chauh a awm tawh tihin substitute Kyah Simon chuan Brazil goalkeeper Luciana tihsual nangchingin goal a khung.

Hun tawp thlengin goal dang a lut tawh lo a, Hmeichhe World Cup goal khung hnem ber Marta-i'n Brazil mualpho tur a chhanhim zo lo.

Group stage-a an khingpui zawng zawng hnehtu Brazil coach Vadao chuan, "Stats leh kan hun ṭha neih zozai kha kan thlir chuan inkhel kan thunun tih a lang a, mahse a chak lo zawka kan ṭan miau avangin kan tan beisei tur a awm ta lo," a ti.

Brazil coach chuan sawi chhunzawm­in, "Australia kha an thawkrimin goal hmaah an hlauhawm em em a, hnehna an chang vangin ka lawmpui a ni," tiin an hneh loh team chu duhsakna a hlan.

Australia hian quarterfinal-ah vawiina Japan leh Netherlands inkhela chak zawk zawk an tum ang.

France hmaah South Korea an zawr

Pathianni Hmeichhe World Cup second round inkhel dangah France hmeichhe team-in South Korea hmeichhe team inkhelh an zirtir a, 3-0 a chakin quarterfinal an in pet tling.

France-in goal an khung hmaa, inkhel ṭan aṭanga minute li na lekah Marie Laure Delie chuan an hmahruaina goal a khung. Korean hmeichhia te an insiamṭhat hmain Elodie Thomis chuan mawi taka Louisa Necib nen ball an in pass kual hnuin minute 8 naah a pet goal ve leh a, 2-0 in France-in hma an hruai der. Goal dang luh belh tawh loin chawlhlawk hman a ni.

Second half an ṭan chiah tihin Delie chuan minute 47 naah France tan a khung leh nghal a, hun tawp thlengin South Korea lamin an chhan let theih loh avangin 3-0 in France an chak ta a ni.

France hian quarterfinal-ah cham­pion tura beisei zinga mi Germany chu Zirtawpni zan khian an tum ang.

A thlengtu Canada quarterfinal-ah

Hmeichhe World Cup second round Thawhṭanni zinga khelhah World Cup thlengtu Canada leh Switzerland an inkhel a, entu mipui 53,885 hmaah Canada hmeichhe team-in 1-0 in hnehna an chang.

Vancouver khawpuia quarterfinal lut tur zawnna inkhela entu zat mipui hi Canada-a infiamna eng ang chi pawh en tura mipui an pun khawm tam ber ṭum a ni.

Canada leh Switzerland inkhela goal awmchhun hi minute 52 naah Josee Belanger chuan Canada tan a khung a ni.

Goal khungtu Belanger a lawm a, Canada striker chuan, "Ka goal khung vanga mipui khati zozai hlim leh lawm taka an au ri hriat leh Canada mipui zawng zawngin an lo en ngei tura beiseina khan min ti lawm leh zual a, he hun hi ka theihnghilh leh tawh ngai lo ang," a ti.

A vawikhat nana Hmeichhe World Cup kheltu Switzerland beiseina erawh a thamral ta.

Canada hian nizana England leh Norway inkhela chak zawk zawk quar­terfinal-ah an tum dawn a, inkhel hi zanlai a nih avangin result kan hre hman lo.