Watford player man to ber Perotti
Season thar aṭanga Premier League khel tur Watford an ṭang a, an club chanchina player man to ber ni turin Genoa winger Diego Perotti chu pound maktaduai 7-in an la lut.
The Hornets tia hminglem an vuahsak Watford hian kum 2007 khan West Brom aṭangin Nathan Ellington chu an player man to ber ni turin pound maktaduai 3.2-in an lo la lut tawh a, Perotti hian a rawn khum ta a ni.
Kum 26-a upa Perotti hian nikum khan Serie A club Genoa hi Sevilla aṭangin a pan a, match 27 a inlanah goal li a khung.
Argentine winger Perotti hian Sevilla-ah kum riat hun a hman chhungin Europa League leh Spanish Cup te a chawi hman a, Argentina tan vawi hnih a inlan ve tawh bawk.
Premier League khel tur Watford hi an ṭang hle a, Perotti hma hian Werder Bremen defender Sebastian Prodl leh Romanian club Steaua Bucharest goalkeeper Giedrius Arlauskis te chu free transfer-in club-ah hian an lo la lut tawh a ni.
Tun thla tir khan Premier League kai puitu an coach Slavisa Jokanovic chu hlawh chungchanga an inrem theih loh avangin an lo ban tawh bawk a, a aiawh tur hian Atletico Madrid manager hlui Quique Sanchez Flores chu ruat a ni.