A vawi thum nan Rosberg-a'n hnehna chang
Pathianni khan Formula 1 Austrian Grand Prix chu Spielberg tlankawngah tlan zawh a ni leh ta. Mercedes driver Nico Rosberg chu pakhatna niin a hnung chiahah a teammate Lewis Hamilton a thleng bawk.
Tun season-a a vawi thum nan Rosberg hian hnehna a chang a, driver championship-ah Hamilton nen an inthlauhna chu point 10 chiah a ni ta. Intlansiak hnuhnung zawk Canada Grand Prix-ah pakhatna a nih tawh bawk avangin a zawnin hnehna a chang a ni.
Pole position aṭang bul ṭantu Hamilton aiin pahnihna aṭanga bulṭan Rosberg-a'n intlansiak bul a ṭan fuh zawk a, German driver hian kawng kawi hmasa berah a teammate hi tlan pel nghalin a tawp thlengin a dinhmun ngaiah a ding tlang thei. Nikum khan helai hmunah hian hnehna a lo chang tawh bawk.
Beiseina sang tak nena intlansiak hmachhawntu McLaren driver Fernando Alonso leh Ferrari driver Kimi Raikkonen te chu lap khatna lekah an chetsual avangin an intlansiak chhunzawm thei lo. Mahse, vanneihthlak takin driver pahnihte hian hliam an tuar lo hlauh.
McLaren driver pakhat zawk Jenson Button chuan safety car rawn tlan luh chhawr ṭangkaiin hmasawn ve mah se a car khawl chian loh avangin intlansiak a tlan tuan thei bik lo. Tun season-ah McLaren hi an chhe takzet a, an car pahnihin intlansiak vawi 16 an hmachhawn tawh aṭangin vawi sarih chu an tlan tluan thei lo tawh a ni.
Mercedes car pahnihin fal takin hmahruai mah se an hnungah hian Ferrari leh Williams an inbei na hle. Sebastian Vettel chuan pathumna dinhmun a luah ngei dawna a lan tawh laiin lap 37-naa an pitstop an hman rei deuh vangin Felipe Massa-a'n a tlan pel. Brazil driver hi pathumna ni zuiin tun season-a a vawi khat nan podium a lawn.
Force India team an che chhe bik lo viau a, Nico Hulkenberg leh Sergio Perez ten point an hlawh chhuak. Australian Grand Prix a parukna Nico zawk hian driver World Championship-ah point 18 hmuin pakuana a ni mek.