Bangladesh an vul, India an mualpho

ICC World Cup quarterfinal-a an hneh loh hnu lakah Bangladesh-in phuba an la a, Bangladesh ramah dawl zawrin India an zawr.

Nimin khan Bang­ladesh leh India hian ODI match an khel. Ruah surin a tihbuai vangin DL method hman a ni a, wicket rukin chak zawkah Bangladesh puan an ni. Ruah hi sur lo mah se Bangladesh hi chak chiang sa a ngaih an ni tawh hrim hrim.

Match khat khelh tur la awm chungin Bangladesh hian a zawna hnehna an chan tak avangin ODI series an la fel der a, match thum khelh turah vawi hnih hnehna changin 2-0 in hma an hruai mek a ni.

Mustafizur bawk

India-in match khatnaa an ngam loh Bangladesh rawlthar Mustafizur Rahman bawk an ngam lo a, India nen an intum hmasak zawka Bangladesh tana a match hmasa ber kheltu hian run 43 chiah pein wicket ruk a la a ni.

Kum 19 leka upa bowler hian match hnih khelh tawhah wicket 11 lai a la ta.

Bat hmasa zawk khawvela batting line-up nei ṭha ber pawl India an che hleithei lo a, ball 60 a run 53 vaw chhuaktu opener Shikhar Dhawan tih loh chu run siam hleithei an awm lo.

Over 20-ah India-in run 200 an tlin hram a, an vaiin an out vek.

Team ṭangrual Bangladesh

Bangladesh bat hun a thleng a, an batsman te'n run siam tam ṭhin lo mah se run siam tlem lutuka 'out' an awm lo. Shakib Al Hasan chuan Bangladesh tan a thawhhlawk ber a, ball 62 a hmachhawnah run 51 a vaw chhuak a, a tawp thleng a dam.

Over 38 an khelh tlin meuh chuan Bangladesh-in India siam zat run 200 an vaw chhuak tawh a, chak turin run khat chiah an mamawh. Ruahsurin inkhel a tibuai zui a, inkhelh chhunzawm theih a nih loh avangin DL method hmangin chak zawkah Bangladesh puan an ni.