Foxes bu zawlah Arsenal

Zanin dar 12:15 hian Arsenal chu League Cup third round khel turin Leicester City khelmual King Power Stadium-ah an lenglut dawn a, mikhual thleng tur Foxes manager Brendan Rodgers chuan player siksawk a tum thu a sawi.

English club-te chuan Premier League, Champions League leh FA Cup an ngaihlu a, heng inelna pathuma an champion rual chuan 'triple champion' an ti ṭhin. League Cup hian ngaihhlut a hlawh tehchiam ngai lo, tunah erawh club ṭha an tam tawh - eng inelna pawh ni se champion a harsa vek tawh.

Rodgers ang bawkin Mikel Arteta pawhin a player chhawr rim loh zawkte tan khelhna hmun a siamsak a rinawm, manager pahnihin team ṭha ber an chhawp chhuak lo ve ve a nih pawhin chak lo zawk nih erawh an duh dawn lo.

Third round inkhel dangah Premier League champion Liverpool chuan League One club Lincoln City an hmachhawn dawn a, a chak zawk chuan fourth round-ah Gunners leh Foxes inkhela chak zawk an hmachhawn leh ang.

Season hmasa khan Leicester hian a bul ṭan fuh mah se season chawhnu lamah an zuih, an squad chhah tawk loh vang a ni a, player ten match an khelh hnem lutuk chuan a tawpah an chau tawngkhawng ṭhin.

Foxes manager Rodgers chuan, "Hri leng vangin season kan ṭan tlai a, tournament a tlem phah chuang si lo. Match khelh tur kan ngah a, chuvangin a theih chen chenah player ka siksawi ṭhin ang. League lama inlan tam lo tan pawh inkhelh tur a tam dawn.

"Player siksawi tih kha a ṭha lo deuh luhtir tihna lam a kawk lo. Kan khingpui tur hi kan zir chiang hmasa zel a, chumi atana hnehna chang thei ngei tur erawh chuan kan inrem a ngai. Result ṭha neih loh chuan boruak a ṭha thei chuang lo," a ti.

Rodgers-a naute hian an league match hmasa pahnihah West Brom leh Burnley te an hneh a, an boruak a ṭha. Arsenal nen an inkhelh aṭanga ni li hnuah Manchester City nen an intawn zui dawn avangin manager tan player rem thiam erawh a ngai dawn.

Arsenal ṭantuten season tharah chuan David Luiz leh William Saliba inkawp hmuh an beisei a, league match pahnih an khelh tawh chinah erawh an la khel dun lo. Hliam vangin Luiz a inlan thei lo a, tunah erawh a dam tawh. Saliba tan erawh player thar Gabirel chu a elpui hautak tur a ni tih a chiang.

Brazilian defender Luiz hi West Ham an hneh ṭumin hun tawp dawnah a inlan thei tawh a, zaninah a tir aṭanga a khelh a rinawm. Saliba pawh junior huangah a inkhel ṭhin, defender pahnih hi a vawi khat nan an khelh dun a rinawm.

Spanish manager Pierre-Emerick Aubameyang leh Alexandre Lacazette te a chawlhtir a nih pawhin Eddie Nketiah leh Nicolas Pepe te tan hun ṭha a ni thung tura ngaih a ni. Reiss Nelson leh Joe Willock pawh an inlan ngei tura ngaih a ni bawk.

Arsenal hian an keeper chhuak ta Emi Martinez hmun ruak luah turin Runar Alex Runarsson an lalut a, Iceland international hi Bernd Leno thachhangdawltu tur a ni a, an lakluhna a la rei loh avangin zaninah erawh a inlan a la rinawm lo.