Juve an tlawm ve ta!

Serie A match 21 chhung tlawm nei loa an kaltluan hnuah Juventus chu an chak lo ve ta, an hneh loh chu Antonio Conte enkawl Napoli an ni - Naples club hian an mikhual Old Lady hi 2-1 in an hneh.

Italian team ṭha pahnih te an inkhelh hmain Conte chuan, "Eng team pawh hi hneh theih loh an awm bik lo," a ti a, a club hlui Juventus chu hneh a tum tih a sawi chiang, a thusawi a umphak hle.

Diego Maradona Stadium-a inkhelah mikhual Juventus tan Randal Kolo Muani chuan chawlhlawk hma hretin goal a khung a, second half-ah Naples lamin Andre-Frank Zambo Anguissa hmanga an sut bakah Romelu Lukaku chuan penalty aṭangin chakna goal a khung.

Napoli coach Antonio Conte chuan, "Tlawm miah loa kaltluang thei team ṭha leh hlauhawm taka kan khelh dan chuan min ti lawm hle, kan result hian min ti lungawi takzet a ni.

"A match zawnin Atalanta leh Juventus kan hneh thei a ni a, inrintawkna nasa tak min pek belh ngei ang tih ka chiang," a ti a, a naute khelh dan leh an tunlai boruakah a lungawi hle.

Napoli hian Serie A match 22 aṭanga point 53 hmuin table chung berah an awm chhunzawm, anmahni hnaih berte Inter Milan aiin point rukin an sang zawk - Inter hian match hnihin an khel tlem thung a ni. Old Lady erawh point 37 nen panganaah an awm.

Juventus manager Thiago Motta chuan, "First half kan khel ṭha em em a, kan khingpui te tan harsatna pawh kan siam hnem. Mahse, a hnu lama kan chet dan kha chuan min ti lawm lo, ven theih tura ngaih kan veng lo kha a pawi," a ti.