Kane-a'n goal a khung, Bayern an chak

November hnua a vawi khat nan Harry Kane-a'n 'open play' aṭangin goal a khung a, SC Freiburg lakah Bayern Munich chu 2-1 in a chakpui.

English striker hian minute 15-na lekah goal hmahruai khungin, South Korean defender Kim Min-Jae-a'n goal hnihna a khung - Freiburg tan Matthias Ginter chuan si phurh a sut ṭhen a, awmzia a nei phak lo thung.

Bayern chak hma hian anmahni hnaih bertu, champion lai Bayer Leverkusen chu inlanin, RB Leipzig khelmualah an chak zo lo a, 2-2 in an inhnehtawk.

Leverkusen hian Patrik Schick leh Aleix Garcia hmangin 2-0 in hma an hruai a, mahse, Leipzig-in David Raum leh Edmond Tapsoba (own goal) hmanga chhangletin, 2-2 in inkhel a tawp daih.

Xabi Alonso naute chak loh laiin Bayern an chak zui a, point rukin pahnihna Leverkusen an tlansan. Hetihlai hian Borussia Dortmund pawh an chak zo lo a, league match li a zawnin an chak zo lo tawh!

Dortmund centre back Nico Schlotterbeck chu minute 21-na lekah hnawhchhuah a ni a, heti chung hian mualneitu team hian Serhou Guirassy leh Marco Friedl (own goal) hmanga khungin, league match thum a zawna an tlawm hnuah an chak ve tawh dawn niin a lang hman.

Mahse, Bremen tan Leonardo Bittencourt leh Marvin Ducksch ten chhangletin, 2-2 in inkhel a tawp.