East Bengal chak ve leh ta

ISL match li zet a zawna an chak zawh loh hnuin East Bengal an chak ve leh ta a, Zirtawpni zan khan an mikhual Kerala Blasters chu 2-1 in an hneh.

Kolkata club hian PV Vishnu leh Hijazi Maher hmangin 2-0 in hma an hruai a, Blasters tan Danish Farooq chuan si phurh a sut - mahse, goal an khung hi minute 84-na a ni tawh a, comeback turin hun a tam tawk tawh lo.

East Bengal tan Lalchungnunga'n inkhel bul ṭanin, Durtlang tlangval hi a khel ṭha tluan chhuak zak a, Blasters tan Freddy Lallawmawma chuan bul ṭanin, bench aṭangin R. Lalthanmawia a lut bawk.

Inrinni zan inkhelah FC Goa chuan 2-0 in Chennaiyin FC an hneh a, Iker Guarrotxena leh Aakash Sangwan ten goal khat ve ve an khung. Goa-in hnehna an chan avangin table chung bera Mohun Bagan an hnaih sawt a, Chennaiyin tan playoff a hla tial tial thung.

Goan club tan Ayush Chhetri chuan inkhel bul a ṭan a, Chennaiyin tan PC Laldinpuia leh Lalrinliana Hnamte ten bul ṭanin, bench aṭangin Laldinliana Renthlei a lut bawk.