Arsenal tana rinawm Aubameyang

Player langsar leh ṭha tam tak chuan an thlen chin aia sang zawk thlen beiseiin Arsenal an chhuahsan tawh ṭhin. Pierre-Emerick Aubameyang erawhin club tana a rinawmzia lantir nan kum thum daih contract a ziak thar, manager Mikel Arteta hnathawh danah rinna a nghah ngam vang a ni bawk.

June thlaa kum 31 tling hlim Auba contract neih lai hi nakkum nipuia tawp mai tawh tur a ni. Barcelona leh Inter Milan ten sawmna duhawm tak an lo chhawp chhuahsak ve reng avangin Gunners fans lam rilru a phawklek hman takzet.

FA Cup nomawi an chawi niah Arteta chuan, "Ngaihngam takin awm rawh u," tiin Auba contract chungchangah fan-te a chah a. Contract pawt sei lo sela chuan nakkum Janaury thla aṭangin a club duhzawng chu zalen takin a be thei tawh ang, tunah erawh fans duh ang a thleng dik ta.

Arsenal player hlawh hnem ber chu Mesut Ozil a ni ṭhin, Germany international hlui hian kar khatah £350,000 a hlawh mek. Aubameyang hlawh tur hi chiang taka tarlan fak ni lo mah se Gunners player zinga hlawh hnem ber a nih thu chu media lamin an ziak.

Media rintlak ESPN-in an tarlan dan chuan, kar khata a hlawh pangngai hi £250,000 a ni ang a, a chet ṭhat dan leh match khelh tam dana zirin £180,000 chu a dawn belh tur a ni - a vai chuan £380,000 a hlawh dawn tihna a ni.

A contract thar aṭang chuan Premier League player mal zingah Auba hian a hlawh hnem ber dawn tihna a ni. Auba hnuaiah hian Manchester United goalkeeper David de Gea (£350,000), Manchester City midfielder Kevin de Bruyne (£320,000) te an awm.

Pierre-Emerick Aubame-yang hian January, 2018 khan Borussia Dortmund aṭangin Arsenal hi pound maktaduai 56-in a zawm a, a hunlai chuan club player manto ber a ni. A club thar tan hian a hun hmasa aṭanga tun thlengin goal thun khawl a ni.

Gunners tana season pumhlum a hman hmasak ber 2018-19 khan Premier League Golden Boot a dawng nghal, season liam ta pawh khan goal khung hnem ber Jamie Vardy (23 goals) chu goal khat chauhin a phak lo.

North London club tan hian inelhna hrang hrangah match 111 khelin goal 72 a khung tawh, league bikah match 86 aṭangin goal 55 zet a khung bakah assists ṭum 12 a nei bawk, hun rei lo te chhunga a hnathawh avangin hlawh hnem a phu.

Aubameyang hian nomawi chawi chu a inkhelh chhan a nih thu a sawi ṭhin, season hmasa khan a club hi FA Cup a chawipui. Semifinal-a Manchester City an hneh ṭum leh final-a Chelsea an hnehin goal pawimawh a khung.

Contract a ziah hnuah Auba chuan, "Arsenal tana contract ziak tur hian buaina ka nei lo. Fans leh ṭhiante chungah ka lawm a, kei leh ka chhungte tan he hmun hi kan in a ni. He hmunah hian hlimna kan tawng a, club tan hian hun ṭha a inher chhuah zel ka ring," a ti.

Arsenal manager Arteta chuan, "Pierre-Emerick hi theihna nei sang bik a ni a, team tan hruaitu ṭha tak a ni bawk, kan hnena awm hi ani leh keini tan a ṭha," a ti. Technical director Edu pawhin an captain chu khelmual pawn lamah mi pawimawh a nih tel thu a sawi ve bawk.

Arsene Wenger-a'n Arsenal a enkawl tirh khan hneh loh nei loa Premier League champion an nih theih a rin thu a sawi a, a thusawi hi mi nuih ti za ni mah se 2003-2004 khan khawvel mak tih khawpin a thlen diktir.

Mikel Arteta pawhin hmathlir thui tak a nei. Chelsea winger hlui Willian a lakluh dawn khan, season tharah chuan Champions League khelh phak an tum tur thu leh, engtikah emaw UCL nomawi chawipui a tum tur thu a hrilh nia sawi a ni.

Spanish manager hian sum ngah lo mah se a mamawh ang player a la khawm zel a, defender William Saliba leh Gabriel a neih belh tawh. Atletico Madrid midfielder Thomas Partey leh Lyon duhlai Houssem Aouar te lakluh tumin an la hel mek bawk.