Suarez aiah Morata = Morata aiah Suarez!

Nipui transfer bazar a ngaih­nawm zel a, Juventus-in Luis Suarez an lalut thei dawn lo nia a lan hnuah an striker hlui Alvaro Morata lam an hawi a, Atletico Madrid-in Morata hmun ruak luah turin Suarez an hnim hnai bawk!

Football transfer ngaih-nawmna chu, "Thleng thei lo a awm lo," tia an sawi ṭhin hi a ni a, European club lian te player inthleng leh inchuh kual vel chu ngaihnawm a la tling reng. Barcelona-in an striker Luis Suarez chu mamawh tawh lo nia an inhriat avangin a thlawna a chhuah an phal a, Juventus leh Atletico Madrid an lo lang vat - tuna a hnaih zawk chu Atletico a ni. Atletico hian an striker Morata chu a chhuah an phal ve thung a, Spanish striker hian a lo hlawhtlin tawhna Turin khawpui a pan ngei hmel

Kum 33 mi Suarez-a'n a zawm tur nia an sawi langsar hmasa ber chu Juventus an ni a, Italian club hian Nou Camp-a tla tlum tawh lo striker hi Cristiano Ronaldo nena khelh dun tir 

an duh. 

Suarez pawhin Juve pan hi a pawiti lo a, kum khata pound maktaduai kua hlawh turin inremna a neihpui hman tawh hial. Mahse, Suarez hian a hunah tak Italian passport a nei thei lo a, Juve an inhnukdawk.

Juve sporting director Fabio Paratici chuan, "Suarez-a'n Italian passport nei tura a nghah chhung tur hi transfer tawp ni emaw Champions League squad thehluh hun kan neih chhung aiin a rei zawk a, hei

vang hian Suarez chu kan lalut lo ang," a ti. 

Italian champion coach Andrea Pirlo pawhin, "Kan hun neih nena chhutin Suarez lakluh hi a harsa a ni," tiin a lo sawi tawh a, a striker duh thlan hmasa ber a nei thei dawn lo. 

Juventus hian Europe khaw-mualpui pawn aṭanga player an neih theih ang zat an nei tawh a, hei vang hian Uruguayan striker hi awlsam taka lakluh ngawt theih a ni lo - Italian passport a neih phawt a ngai. 

Suarez-a nupui hi Italian thisen kai a nih avangin Barce­lona striker hian Italian passport neih theihna dan a nei a, Italian ṭawng a thiam leh thiam loh thlengin test a nei hman thlap. 

Khawthlang media-te chuan Suarez hian Italian language test hi a pass niin tarlang mah se passport chhuak tura nghah chhung hian hun a duh deuh hlek a, Champions League-a chhawr theih loh tura striker lakluh hi an tan awmzia a awm lo. Juve an inhnukdawk a, Spanish striker Morata lam an hawi zui. Atletico Madrid striker hian a lo hlawhtlin tawhna club hi a zawm ngei a rinawm. 

Juve hian an duh huna Suarez an lakluh theih loh avang hian AS Roma striker Edin Dzeko pawh an dawr. Mahse, Serie A-a tlangnel tawh sa striker hi Roma-in Napoli striker Arkadiusz Milik an lakluh phawt loh chuan an kaltir thei lo. 

Andrea Pirlo-a'n player a nih laia Juve tana a lo khelhpui tawh Morata lakluh a thlang a, nimin khan Morata hian medical nei turin Turin khawpui a thleng - he thuziak i chhiar meuh chuan an inrem fel tawh hial mai thei. 

Juve hian Morata hi loan-in an hawh phawt dawn a, loan-a an hawh manah hian Atletico Madrid hnenah pound maktaduai riat an pe dawn - a loan hun a hman zawhah a ngheta lakluh theihna dan an nei dawn a, an duh chuan pound maktaduai 41-in an lalut thei ang. 

Kum 27 mi Morata hian Juve tana season hnih a lo khelh tawhah khan match 93 inlanin goal 27-a khungsak a, Champions League 2015-a final an luh theih nan player ṭangkai niin UEFA Champions League Squad of the Season-ah a lang phak hial.

Atletico-in Morata chhuah an phal a, a hmun ruak luah tura an sawm chu Luis Suarez a ni. Barcelona-in duh tawh lo mah se Suarez hian season hmasa khan inelna hrang hranga match 36-a khelh aṭangin goal 21-a khung a, assist vawi 12-a nei tel thei. 

Mahse, Barcelona-in an sual an chhuah zui - Suarez-a'n Atletico nen inremna an nei hnai tawh nia a lan laiin Uruguayan striker hi Madrid khaw club lama a kal an phal dawn lo niin Spanish radio station Onda Cero chuan an puang. 

Barca hian an striker hi Real Madrid, Manchester City leh Paris Saint-Germain-ah chuan a kal theih loh tur thu an tichiang sa a, heng ho zingah hian Atletico hi an telh belh! Atletico hian Morata an chhuahtir dawn avangin Suarez an lalut thei lo a nih pawhin PSG chhuahsantu Edinson Cavani chu lakluh turin an hel sa nia sawi a ni a, Suarez chhehvel hi a la tawp mai dawn lo niin a lang.