Goal li khung thei tur ka ni - Ibra

Zlatan Ibrahimovic a la danglam lo, Swede striker hian goal khung thiam bik a nihna a la theihnghilh lo a, goal khung ang bawkin chanchinbu mite hma a thu ngaihnawm sawi pawh a la bansan chuang lo.

Thawhṭanni zan Italian Serie A inkhelah Ibra hian goal hnih khungin AC Milan chu Bologna lakah 2-0 in hnehna a chanpui a, inkhelh banah a kum la naupang deuh se la chuan goal li lai a khung a rin thu a sawi chhuak.

Kum 38 mi Ibra-himovic hian Theo Hernandez-a cross chu sang taka zuang chungin a tauh lut a, an goal hnih nan penalty a chhuih lut bawk. A hun ṭha neih hnuhnung a hlah avang erawh chuan Serie A-a hattrick siam thei upa ber nih theihna kawng chu a bawhpelh.

Ibra chuan, "Ka dam ṭha, rim takin ka la thawk reng. Season thar atana kan match pangngai pahnihna a ni a, kan chak ve ve hi a lawmawm. 100% la ni chiah lo mah ila kan ti ṭha thawkhat," a ti. League hmain Europa League qualifier lamah Ibra goal hmangin an chak tawh bawk.

Striker palian Ibra-himovic chuan sawi zawmin, "Kum 20 mi chauh chu la ni ila tuna ka khung bakah khan goal hnih dang ka khung belh ang, ka sawi tawh ang khan ka kum tam deuh tawh mah se ka ṭha telh telh zawk a ni.

"Player naupang zawkte pawh an khel ṭha, an thawkrimin thurawn kan pek pawh an zawm ṭha hle. Mawhphurhna sang leh pressure hi ka chungah awm se, ka naute hi chuan nuamti leh engthawl takin khel thei se ka duh," tiin player naupang tana entawk tlak nih a tum.