Bul ṭan ṭha tur Italian club Parma
Parma hun a ral ta. Thawhṭanni thleng khan Italian club Parma-in leiba rulh theihna hun an nei a, an rul thei lo.
Baseball player hlui Mike Piazza leh sumdawng hausa Giuseppe Corrado ten leiba ngah club Parma lei tum zet mah se an inhnuhdawh tak avangin an leiba pound maktaduai 16.2 an rul thei lo.
Parma hi season tharah Serie B-ah inziah luh an phal sak lo a, fourth division aṭanga bul an ṭan ṭhat a ngaih tak avangin professio-nal club ni ṭhin kha club tenau zingah chhiar tel an ni tawh ang.
Italian club lar Parma hian season hman zawh takah khan player-te hlawh an pek theih loh avangin point paihsak an ni a, season tawpah an him zo lo. Nikum khan 2013/14 season-ah paruknaa an awm avangin Europa League khel thei dinhmunah ding mah se pawisa ba an ngah avangin UEFA dan an zawm thei lo a, European competition-ah tel phal sak an ni tawh lo bawk.
Parma hi Serie A-ah la champion lo mah se Coppa Italia-ah vawi thum an champion a, UEFA Cup-ah vawi hnih leh Euorpean Cup Winners Cup-ah vawi khat an champion bawk.
1999 UEFA Cup an champion ṭuma Parma starting eleven-ah khan player ropui tak tak an khel a, final-ah Marseille 3-0 in an hneh. Parma hian final-ah 3-2-3-2 formation an hmang a, player lutte chu : Gianluigi Buffon; Lilian Thuram, Roberto Sensini(c), Fabio Cannavaro; Dino Baggio, Alain Boghossian; Diego Fuser, Juan Sebastian Veron, Paolo Vanoli; Hernan Crespo leh Enrico Chiesa te an ni.
Buffon, Thuram, Cannavaro, Veron, Crespo te bakah player ṭha tak tak chher chhuaktu Parma hi Italian league sang ber khel leh tur chuan kum tam fe an mamawh ang.