Ram aiawh tum Bolt

Usain Bolt chuan kum­in August 22 aṭanga 30 chhung China khaw­pui Beijing-a neih tur International Associa­tion of Athletics World Championships-ah Jamai­ca ram aiawh a intlansiak hmachhawn ngei a tum.

IAAF World Cham­pionship hi khawvela in­fiammite intawh khawm­na lian ber pawl niin ram hrang hrang 200 aṭangin infiammi 2000 vel an kal khawm ṭhin a ni.

Kum 28-a upa sprinter hi he intihsiaknaah hian 100m leh 200m champion lai ni mah se kumina an ram aiawm turin sprinter dang Asafa Powell leh Yohan Blake te an awm ve tho avangin an inel hmasak a ngai dawn a ni.

June 25 khian King­ston stadium-ah heng sprinter te hi an intlansiak chhin phawt anga, inelnaa tel tur zawnna hian ni thum chhung a awh ang. Henga tiṭhate hian ram ai an awih thei dawn a ni.

Inel tura an inbuatsaih mek lai hian Jamaica Athletics Administrative Association president Warren Blake chuan, "Kum 2012 pawh khan kan inpuahchah laiin Bolt hi a ti ṭha ber chu a ni lo. Mahse intlansiak tak tak na hmunah erawh a chungnung hle thung. Kuminah pawh hian beisei angin lo che ṭha tawk lo palh pawh a ni thei, amaherawhchu Beijing-ah chuan hneh theih loh ang maiin a tlan leh thei ang," tiin Bolt a lo chhan lawk hle.

Bolt hian Olympic gold medal paruk lai la tawhin tunah hian mipa 100m leh 200m intlansiak record chelh mektu a ni.