Bournemouth leh Distin inrem
Premier League club thar Bournemouth chuan Everton player hlui Sylvain Distin chu season thar atan an la lut dawn.
Tun season liamta zawh rual khan Distin a contract neih lai hi a tawp ve nghal a, a club Everton-in contract thar an ziahpui tawh loh avangin a duh lam a hawi thei a ni.
Kum 37-a upa French central defender hian medical test neih ala hmabak a, a paltlang thei a nih chuan Premier League club hrang hrang pangaa a khelhna tur a ni ang. Tun hmain Newcastle, Manchester City, Portsmouth leh Everton tan a lo khel tawh.
Bournemouth manager Eddie Howe hi season thar atan a inpuahchhah nasa hle. Goalkeeper pahnih Artur Boruc leh Adam Federici te chu Southampton leh Reading aṭangin a lo la lut tawh a, striker Josh chu free tranfer-in Blackburn aṭangin a lalut tawh bawk. Ghana winger Christian Atsu chu Chelsea aṭanga loan-a hawh turin an inbe fel tawh bawk a ni.