Chelsea striker Bertrand Traore-a'n work permit a hmu

Tunhnaiah FA work permit pek dan thlak danglam a ni a, Burkina Faso striker Bertrand Traore chu a work permit fel theih loh vanga Chelsea a zawm theih loh reng hnuin season thar aṭang chuan Chelsea tan a inlan thei dawn ta.

Kum 19-a upa striker hian January 2014 khan Blues hi a zawm a, mahse a work permit fel theih loh avangin Dutch club Vitesse Arnhem lamah loan-in a khel leh phawt a ni.

Netherlands lamah Traore hi a che ṭha hle a, season hman zawh taka Dutch league Eredivisie-ah goal 19 zet a khung. Manchester United-in PSV Eindhoven aṭanga pound maktaduai 31-a an lei Memphis Depay-a'n match 30 inlanah goal 22 a khung a, Depay-a goal khung zat leh Traore-a goal khung zat hi a inthlau lo.

Kum 15 leka upa a nih laia an ram Burkina Faso tana inlan thei Traore hi United States-a Chelsea tour-ah tel tura beisei a ni a, field chhungah a inlan thei a nih chuan New York Red Bulls, Paris St-Germain leh Barcelona te a hmachhawn thei dawn a ni.