Petr Cech-a hawi lam tur la chiang lo

Chelsea goalkeeper Petr Cech leh Arsenal te chu hlawh chungchangah a thuphungin inrem tawh angin report awm mah se Czech keeper berin an la inbiak fel loh thu a tarlang.

Management company - The Sports PR Company chuan twitter-ah "Mail Sport leh Lee Clayton te kan hrilh tawh ang che u khan Petr Cech-a transfer chungchang hi tihfel a la ni lo, a chian hunah chuan Cech-a'n a sawi chiang ang," tiin twitter-ah an ziak. He thu hi Chelsea keeper hian twitter-ah a ziak nawn leh bawk.

Mail Sport hi infiamna lamah chuan British chanchinbu lar ber zinga mi a ni a, Dailymail hnuaia awm a ni. Lee Clayton hi infiamna bika an hotupa a ni thung.

Arsenal a rinawm

Petr Cech hian Chelsea ang bawka London club Arsenal tho a pan a rinawm a, thu thar berah hian a la chiang lo tih chauh niin club dang hming tarlan tel a ni lo.

Chelsea captain John Terry chuan, "Arsenal leh Petr Cech an inbe mek a, an la lut thei a nih chuan an ṭhat pui khawp ang. Cech vang hian Arsenal-in point 12 aṭanga 15 chu an hlawhchhuak thei ang," tiin an keeper chu a a fak hle.

Chelsea captain chuan Cech chungchang sawi chhunzawmin, "Nikum khan Petr hi a puitling hlein ka hria. Match khelh loh kha atan pawh a hreawm ngei ang, amaherawhchu khelhna hun a neih chhunah khan a che ṭha thei hle. Tunah chuan inkhelh a duh a, a dinhmun hi ka hrethiampui hle," a ti.

Thu leng vak

Chelsea hian Czech keeper manah hian pawisa bakah Alex Oxlade-Chamberlain emaw Theo Walcott emaw an beisei tel a, amaherawhchu thuthar berah chuan Arsenal-in English player hi keeper thleng nan an phal lo a, pawisa hmangin club pahnih hi an indawr fel ang.

Chelsea manager Jose Mourinho chuan Paris St-Germain pan turin Cech hi a duh a, chutihrualin manager aia thu zawk club neitu Roman Abramovich-a'n veteran keeper hi a club duh apiang zawm turin phalna a pe thung.

Petr Cech hian Chelsea-ah kum khat daih contract la nei mah se season liamta khan Thibaut Courtois tluk loin second keeper a ni a, khelhna hmun a chan theihna tur club ṭhaa chhuah a duh.

Tun dinhmunah chuan kum 33-a upa Cech hi a chhuak dawn chiang a, a kalna tur chu Arsenal niin a ngaih theih.

Hetihlai hian Arsenal forward Joel Campbell chuan season tharah London club hi a chhuahsan hmel bawk. Costa Rica striker hi David Moyes-a enkawl Real Socieded-in pound maktaduai 6-in an dawr a, Arsenal-in an hnawl. Amaherawhchu khelhna hmun chang tam lo Campbell hi Benfica-in lak an tum niin a sawi a, Arsene Wenger-a'n tranfer huna budget ngah zawk nan a hralh ngei a rinawm.

Campbell bakah German forward Lukas Podolski-a'n season tharah Arsenal a chhuahsan bawk ang.