Nipui transfer Van Gaal leh United ten thawm an nei lian
Spanish keeper David de Gea chungchangin tawp lam a la hnaih lo a, Manchester United lamin keeper hi awlsam taka chhuah an tum lo. Louis van Gaal hoten Real tan harsatna siamin Spanish defender Sergio Ramos an duh thu an hrilh.
Manchester United-in nikum khan transfer-ah khan Ander Herrera, Luke Shaw, Marcos Rojo, Angel Di Maria, Victor Valdes leh Radamel Falcao te lak luh nan pound maktaduai 150 bawr vel an hmang a, UEFA Champions League khel turin an tling hram. Kumin transfer-ah hetiang zat bawr vel hi an hmang leh tura ngaih an ni.
Thuthang awmze nei
Sergio Ramos hi Real Madrid player zinga nghet berte zinga ngaih theih a ni, chhuak tur anga an sawi chhan hi Real-in an duh loh vang ni loin a lungawi loh vang a nih tlat avangin thuthang awmze nei a ni.
Spanish defender Ramos hian 2017 thleng Real Madrid-ah contract a la nei a, kum khatah euro maktaduai 6 vel a hlawh. Kum 29-a upa defender hian kum khata euro maktaduai 10 hlawh a phut a, Real hotuten an uk sak lo.
Hetihlai hian kum khata euro maktaduai 9 aṭanga 10 vel hlawh Gareth Bale chu euro maktaduai khatin a hlawh an pun sak thung. Chumai a ni lo, Ramos-a tluk pui defender ṭhaten euro maktaduai 10 an hlawhtling a (Thiago Silva, €12m; David Luiz €11m), Real defender hian John Terry leh Gerard Pique te aiin a hlawh tlem zawk.
Ramos hi a hlawh an pun sak loh avangin a lungawi lo a, coach Carlo Ancelotti an ban vangin an lawm lo niin an sawi bawk.
Barcelona president chuh tum Jord Majo pawhin Sergio Ramos lak luh chu campaign au hla ber atan a hmang a. Amaherawhchu Ramos-a agent leh a unaupa ni bawk Rene Ramos chuan Barcelona a zawm loh tur thu a sawi thung.
Kum 2005-a Sevilla aṭanga Real Madrid zawmtu Ramos hi Spanish club-ah hian a nghet bik lo a, Spanish club tan defender hi David de Gea lak luh theihna remchang a nih bawk avangin Manchester United nena an sawi zawm hi a mak lo.
A to lua e
Lungawi loh vanga chhuah theih tih a awm lo, Ramos la chhuak tur chuan pawisa a ngai tel. Spanish defender lak chhuah theihna zat (buyout clause) hi euro maktaduai 200 a ni a, United-in hetiang zat hi pawisa an sen ngam a, Ramos-a'n a duh bawk chuan an la lut thei. Mahse Lionel Messi meuh pawhin hetiang zat hi chu a phu si lo.
Real hian ram leh club tana lawmman lak thei zawng zawng la vek tawh defender manah hian euro maktaduai 65 (£45m) an chhiar niin tarlan a awm a, hei erawh defender ṭha mamawh Manchester United tan chuan uluk taka ngaihtuah tham a ni.
Depay hnung zui tur
Manchester United-in Eredivisie top scorer Memphis Depay chu PSV Eindhoven aṭangin pound maktaduai 31-in an la lut tawh a, Dutch winger chauh hi 2015/16 season-a United player thar tur a ni lo a, midang erawh an la chiang lo.
United lak tum zingah keeper Jasper Cillessen (Ajax); Tottenham duo Hugo Lloris leh Harry Kane; Bayern Munich duo Jerome Boateng leh Bastian Schweinsteiger; Real Madrid duo Sergio Ramos leh Karim Benzema te chu hming langsar an ni.