Italy-ah match-fixing vangin mi pasarih man
Italian football-in chanchin duhawm lo a nei leh ta. Serie B club Catania match ṭhenkhat chu thamna sum hmanga tihbuai nia hriat a ni a, he thil an chhuichiannaah hian police te chuan mi pasarih an man a ni.
Serie A club ni ṭhin Catania hi 2013-14 season khan Serie B-ah an tla thla a, season hman zawh takah khan Italy second division-ah hian 15 na an ni.
He thil thleng chungchang chhui tu te chuan match nga emaw sarih velah match-fixing hi a awm niin an ngai a ni.
Catania police superintendent Marcello Cardona chuan match-fixing chungchang chhui chianna neih a nih chhan chu Catania club president Antonino Pulvirenti an chhui chiang tura ngenna lehkha a thehluh vang niin a sawi.