Chelsea-in Mendy manah Rennes inrempui

Pathianni zana Liverpool laka tlawm hlim Chelsea chuan Rennes aṭanga goalkeeper Edouard Mendy lalut turin French club hi inremna an neihpui ta a, he thuziak i chhiar meuh chuan an in lalut fel tawh hial mai thei. 

Kum 28 mi goalkeeper man zat tur hi puanzar ni lo mah se pound maktaduai 22 bawr vel ni tura ngaih a ni a, Chelsea boss Frank Lampard chuan Mendy hi a keeper neihlai Kepa Arrizabalaga nena inel turin a duh. 

Pound maktaduai 71 man Kepa hi Pathianni zana Liverpool nena an inkhelh ṭum pawhin a chesual a, Sadio Mane chuan goal-a khung phah - Lampard chuan Kepa chetsual hi an tan a pawi thu a lo sawi tawh. 

Chelsea hian zanin dar 12:15-ah League Cup third round khel turin Barnsley an mikhual dawn a, Lampard chuan kum 38 mi goalkeeper Willy Caballero chuan Kepa aiah inkhel bul a ṭan tur thu a sawi. 

Stamford Bridge-a kum nga chhung contract ziak tur Mendy hian season hmasa khan Ligue 1-ah match 24 khelin vawi kua goal a chhuah lo a, Kepa hian league match 33-ah vawi riat clean sheet a nei thung.

Mendy-a'n 76.3% save percentage a nei a, minute 114 dan zela goal chhuah ang a ni. Kepa save percentage hi 53.5% a ni a, minute 63 dana goal chhuah ziah ang a ni - khawvela goalkeeper manto ber tan chuan inenfiahna tur a ni. 

Kepa-a passing accuracy hi 79.7% a nih laiin Mendy erawh 70.1% a ni a, khaikhinnaah Mendy a sang zawk viau chungin Premier League leh Ligue 1 inthlauhna erawh hriat tel a ṭha.