FIFA president chuh tum Maradona

Argentina football legend Diego Mara­dona chuan FIFA president chuh ve a tum dawn niin a ṭhian hnai tak Victor Hugo Morales chuan a sawi.

Khawvel footballer ropui ber pawl Mara­dona hian May thlaa FIFA president thlanna neih zawh takah khan Prince Ali bin al-Hus­sein chu a lo thlawp tawh a, president ṭang­lai Blatter-a'n a ban tur thu a puan takah chuan amah ngeiin chuh ve a tum ta zawk niin a lang.

Uruguayan journalist Morales hi nikum Brazil World Cup neih zawh takah khan Maradona nen TV lama World Cup sawi honaah an thawk dun a, an inkawmngeih hle nia sawi a ni.

Morales chuan, "FIFA president hna a chuh tur thu Maradona hian min hrilh a, mipui hnenah he chanchinthar hi lo thehdarh turin min hrilh a ni," tiin twitter lamah a tarlang.

South America lama an journalist lar ber pawl Morales chuan, "FIFA president inthlan tur chungchanga ka zawhna chu, 'Kei pawhin ka chuh ve dawn,' tiin Maradona chuan min chhang a ni," a ti.

Khawvel footballer piang tawh zawng zawnga ṭha ber anga mi tam takin an ngaih Maradona hian khelmual chhungah tawnhriat ngah tawh hle mah se administration lamah erawh tawnhriat a la ngah lo hle.

A club khelh ṭhinna Boca Juniors vice-president hna kum 2005 khan a lo chelh tawh a, Coaching lamah Argentina football team leh UAE club ṭha Al-Wasl F.C te a lo enkawl tawh bawk.