Sponsor hnawl tum Laporta

Barcelona president chuh tum Joan Laporta chuan thlan tlin a nih chuan jersey hmaah sponsor tarlang loin UNICEF an tarlan leh zawk tur thu a sawi.

Kum 2003 aṭanga 2010 chhung Barca pre­sident lo ni tawh Laporta chuan, "UNICEF hi Barcelona jersey hmaa awm leh turin kan duh. Club hian sum hmuhna dang an ngah a, kan kawr hlutna tih tlak hniam hi a ṭul lo. Club hlutna tih nun zel hi a pawimawh," tiin a sawi.

Laporta hian Bar­celona leh France player hlui Eric Abidal chu president atana thlan tlin a nih chuan technical director-a an ruat tur thu a sawi bawk.

Catalan club hian an jersey hi an serh em em a, 2005-06 season thleng khan sponsor an tarlang ngai lo. 2006-07 season aṭangin kawr hmaah UNICEF a chuang ṭang a, Barcelona-in pawisa an hmu lo a, UNICEF hnenah hian kum khatah euro maktaduai 1.5 an pe zawk.

Kum 2011 aṭang khan jersey aṭangin pawisa an la lut ṭan. Qatar Sports Investments hnen a­ṭang­in kum nga atan euro maktaduai 150 an la lut a, club hruaitute an sawisel phah nasa hle.

Nikum khan Barce­lona jersey hmaah Qatar Airways tih a chuang a, UNICEF chu kawr hnung­ah an tarlang thung.