Olympic Day Run Vanlalpeka a tlan chak ber

Nimin zing khan Mizoram State Olympic Association buatsaihin Olym­pic Day Run chu Aizawlah neih a ni a, intlansiak (Long distance running) hmanga inelna neih a niin intlansiak hi Bawngkawn aṭanga Lammual thleng tlan a ni.

Vanlalpeka, Lunglei Ramthar chuan minute 16 leh second 41-ah thlengin mi­pa­ah pakhatna a ni. Hmeichhiaah Kros­­hmangaihsangi, SAI, Mission Veng­thlang chuan minute 22 leh second liah thlengin pakhatna a ni ve bawk.

Ruahsur hnuaiah mi 100 chuang zetin intlansiakna an hmachhawn a, kum 11-a upa Benjamin Lal­lawmkima, Lawipu (SAI) chu mipa tlan zinga naupang ber niin minute 22-ah a tlan thleng. Hmeichhe lama naupang ber Mimi Vanlalṭhazuali'n minute 25-ah a tlan thleng, Mimi hi kum 5 mi (Kum nga leh a chanve) leka upa a ni. Mimi leh Benjamin te hi lawmman (special prize) hlan ve ve an ni.

Olympic Day Run 2015-ah hian sports minister leh Mizoram State Olympic Association-a sr.vice president ni bawk Zodintluanga chu khuallian a ni a, khuallian hi parliamentary secretary (sports) Hmingdailova Khiangte-in a ṭawi­awm. MSOA hruaitute leh Sports Association hrang hrang hruaitu ṭhahnem tak an tel bawk.

Olympic Day Run-ah hian top 10 chinte hnenah lawmman sem a ni. Mipa leh hmeichhiaa pakhatna ten Rs 5000 ve ve, pahnihna ten Rs 3000, pathumna ten Rs 2000 ve ve an dawng a, a bak mi pasarihte hnenah consolation prize hlan an ni.