Hmeichhe World Cup England an 'comeback', quarterfinal an lut

Nimin zing khan England leh Norway te'n Hmeichhe World Cup second round an khel a, English hmeichhe team-in 2-1 in hnehna an chang.

Hmeichhe World Cup-a an match hmasa berah England-in France hneh loin anmahni ṭantute an hawihai a, an match hnihna a an chak hnuah erawh an hawi kir tawh lo. Group stage match thum khelhah vawi hnih chakin second round an lut a, quarterfinal lut turin hnehna an chang leh ta.

England leh Norway inkhelah hian beisei angin goal a lut hma lo. Second half minute 54 naah goal kan hmu ṭan chauh a, khel ṭha zawk Norway-in Solveig Gulbrandsen hmangin an pet goal.

England an harh zawk a, si an phur rei lo. Goal luh aṭanga minute sarih na lekah Steph Houghton chuan corner aṭanga ball lo kal phei chu an si phurh sut nan a lo tauh lut.

Inkhel ṭan tir lama khel ṭha lo England an khel ṭha tawlh tawlh. Minute 76 naah Lucy Bronze a lo lang a, England chakna goal ni turin mawi em emin hla tak aṭangin Norway goal-ah ball a thlawh lut.

Inkhel tawp thlengin goal dang a luh belh tawh lo a, Hmeichhe World Cup knockout match-a an chak hmel hmasa ber England-in an hmu.

England hian quarterfinal vawi thum an lo lut tawh a, World Cup lo neih tawh ṭhinah team tel thei zat an la tlem avangin group stage aṭangin quarterfinal hi an inhlangkai nghal ṭhin. An quarterfinal match khelh tawhah hian chak hmel an la hmu lo fai vek. Kumin World Cup thlengtu Canada nen Pathiannia quarterfinal an khelh hunah an sulhnu duhawm lo hi thaireh an tum ang.

USA an kal zel

Vawi hnih Hmeichhe World Cup champion lo ni tawh USA-in champion leh an tumna kawngah kawng dik an zawh zel a, group stage-a France barakhaihtu Colombia chu 2-0 a hnehin quarterfinal an lut.

Goal awm lo a chawlh­lawk an hman zawh hnu lawkin Colombia an vanduai a, an goalkeeper Catalina Perez chu a foul vangin hnawhchhuah a ni mai bakah penalty a chawi. USA tan Abby Wambach chuan penalty hi goal-ah chan tir thei lo mah se Colombia-in an keeper hnawhchhuah an tuar.

Minute 53 naah USA tan khawvel hmeichhe footballer hlawh hnem ber leh chhelo bawk Alex Morgan chuan goal a khung ta nge nge a, Colombia kee­per tan tih theih a awm lo.

USA-in he inkhela a vawi hnih nan penalty an hmu leh a, minute 66 naah Carli Lloyd chuan penalty hi goal-ah chantirin hun ṭha a khawhral ve duh lo.

Inkhel tawp thlengin goal dang a lut tawh lo a, Zirtawpnia China tum turin USA-in quarterfinal an lut.