Nadal leh Federer faktu Becker

Novak Djokovic-a coach Boris Becker chuan mipa tennis player langsar pahnih Rafael Nadal leh Roger Federer te chu an nungchang entawn tlak a tih thu leh anni pahnih an awm loh hunah midang ten an nungchang mawi ang hi an neih ve loh palh a hlauh thu a sawi.

Grand Slam nomawi vawi ruk ngawt mai lo chawi tawh tu Becker hi kum 2013 aṭang khan Djokovic a coach niin tun thlengin an la inkawp rem hle.

Nadal hi kum 29-a upa a nih tawh bakah hliam a neih ngun avangin tennis a khel tam tawk tawh lo. Swiss tennis legend Federer pawh kum 33-a upa a nih tawh bawk avangin a vanglai a pel tawh tih chu a inkhelah a chiang hle a, hun rei tak a inkhelin a rinawm tawh loh. Anni pahnih an chawlh hunah chuan kum 28-a upa pahnih Djokovic leh Andy Murray te hi mipa player langsar tur an ni dawn.

Kum 47-a upa German Becker chuan, "Rafa leh Roger te hian khawvel mit hmuhah inkhel ropui leh hmuhnawm min entir ṭhin, an inkhel bakah an nungchang hi a entawn tlak hle. Hun harsa leh khirhkhan tak tak chu an tawng ve ve ang tih chu a chiang reng, mahse chung vang chuan an buai phah lo, huaisen takin hnehtu an ni leh thei ṭhin. Hei bakah hian an khingpuite an zah thiam ṭhin em em bawk," tiin tennis player ropui pahnihte a fak hle.

Sawi chhunzawmin Djokovic-a coach chuan, "Nakinah chuan Rafa leh Roger-a te hun hi ala liam ve dawn a, chutih hunah chuan player naupang zawk te hi thianghlim leh mawi takin an inel ve lo ang tih ka hlau hle. A bik takin Murray leh Djokovic te hian an hnuhma ṭha tak hi an chhunzawm sak ka duh hle," a ti.

Tunlaia mipa tennis player duhawm pahnih Australian kum 20-a upa Nick Kyrgios leh kum 19-a upa Thanasi Kokkinakis te pawh hian heng player langsarte aṭang hian zir tur an ngah hlea a hriat thu a sawi tel bawk.

Karleh Thawhtṭanni aṭanga khelh ṭan tur Wimbledon atan tennis player te an inbuatsaih mek a, World number 1 Djokovic hian a champion nomawi humhim ngei a tum laiin Federer-a'n a vawi riat nan champion leh a tum ruh hle bawk.

Grand Slam vawi 14 champion tawh Nadal hi tun hnaiah beisei angin khel chuak lo mah se tournament lianah chuan a tawh a khirh leh viauin a rinawm a, Queens Club champion hlim Murray te ho nena an inel tur boruak hi tun aṭangin a lian tawh hle.