Kuminah bike khalh a harsa - Marquez
MotoGP World champion nilai Marc Marquez chuan kum dang aiin kuminah hian MotoGP bike ho hi khalh a harsain hei hian rider banah nghawng a nei lian hle a a rin thu a sawi. He thu hi Valentino Rossi pawn a ṭawn pui hle.
Kuminah hian bike an khalhnaah Dani Pedrosa, Stefan Bradl, Pol Espargaro leh Suzuki rider Pol Espargaro te chuan an banah harsatna an neih avangin zai an tawk vek tawh.
Ban na vanga zai ngai an tam tak em avang hian Honda rider Marquez chuan, "Kuminah hian kum dang aiin kan bike hi a khawng deuh a, chubakah a clutch hman nasat a ngai em em bawk. Ṭang taka kan intlansiak a nih chuan kan ban tha kan hmang nasa em em a, bike khalh nuam leh nem deuh kan mamawh in ka hria. Kan bike hi chak in ṭha em em vek mah se kan hriselna kan ngaih pawimawh hmasak a ṭul awm e," tiin a sawi.
World championship-a hmahruai mektu Rossi pawn sawi vein, "Kum dang ngaihtuah chuan kuminah hian ride ban na an tam tawh hle, kan bike khalh dan leh bike-ah hian thil fuh lo lai deuh chu a awm ngei niin a lang. A hma thei ang bera a sut kianna tur kan hriat a hun tawh," tiin a sawi ve bawk.
Tun season-ah point 138 hmuin Rossi hian driver championship-ah hma a hruai mek a, amah hnaih bertu a teammate Jorge Loremzo nen point khat chauhin an inthlau mek. Hetih lai hian beisei anga season hmang ṭha lo Marquez chu point 69 hmuin panganaah a awm mek.