Messi kianga khelh nghakhlel Pjanic

Barcelona midfielder thar Miralem Pjanic chuan Lionel Messi kianga a khel thei tur chu a lawm thu leh, Argentine forward nen khelmuala hun hman dun a chak tawh thu a sawi 

chhuak bawk.

Bosnia international hi season hmasa khan Juventus rinrawl a ni a, nipui bazar laiin Catalan club hi a zawm. Spanish club a zawm hnuah Covid-19 a kai tih hmuhchhuah a ni a, tunah chuan hri leng lakah hian fihlim tawhin training a nei thei tawh.

Kum 30 mi Pjanic chuan, "Messi nena inkhelh dun hi ka duhthusam ṭhin a ni a, khelmual chhungah in man taka kan khelh theih ngei ka beisei," tiin a sawi. Barca jersey number 8 a ha dawn a, he number hi captain hlui Andres Iniesta hak ṭhin kha a ni.

La Liga club a zawm chungchang sawi zuiin Pjanic chuan, "Kum ruk mi chauh ka nih lai khan Barcelona tana khelh hi ka chak daih tawh, mahse ka duhthusam chu tun hunah hian a lo thleng dik chauh si.

"Ka khelh hmasak tawhna club-te ka zah em em a, chutihrualin tunah chuan khawvela club lian ber ka zawm theih tak avangin ka lawm hle a ni," tiin a sawi a, an captain Messi chhuah tum thawm khan a tih lungngaih hman thu a sawi tel bawk.

Barcelona hian an thiampuipa Messi chu an chelh dawn tih a chiang tawh a, striker Luis Suarez leh midfielder Arturo Vidal te erawh an chhuak dawn niin khawthlang media-ten an tarlang. Uruguay international Suarez hi Italian champion Juventus lamah a kal dawn a, Chile international hi Inter Milan nen an in be mek thung.