McAllister-a'n Liverpool a beisei sang

Liverpool player hlui Gary McAllister chuan Reds chu transfer market-a an chet ṭhat em avangin season tharah Premier League-a a sang pali dinhmun an hauh leh theih ngei a rin thu a sawi.

Anfield a cham laia FA Cup, League Cup leh UEFA Cup chawitu McAllister chuan, "Club dang pawh an inla ṭha ve ngei dawn tih a chiang a, mahse hei hian Rodgers hi a fuih phur dawn a ni. Season hnih liamta kha kan en chuan kan vanduai vang chauhin Premier League nomawi kan chawi lo a, chuvangin player ṭha tak tak kan lakluh zel chuan a sang pali zinga tel hi a harsa lo a ni," a ti.

Reds hian player pali Danny Ings, James Milner, Adam Bogdan leh Joe Gomez te an la lut der tawh a, heng zinga McAllister ti lawmtu ber erawh Milner a ni.

Scottish midfielder hlui McAllister chuan, "Ka ngaihdanah chuan player ṭha tak kan lalut a ni. Player theihna ngah tak, position hrang hrang pali vela khel thei a ni a, international level-ah tawnhriat a ngah tawh hle bawk. Liverpool-ah hian tawnhriat nei ṭha tak tak player an awm nual a, chung zinga Milner tel tur hi a ṭha lehzual a ni. World Cup leh Euro-ah te pawh lo inlan tawh player a nih avangin kan ṭangkaipui ngei ang. Anfield hi Milner hian nuam a ti hlein ka ring a ni," a ti.