Nico Rosberg khan chak a phu - Hamilton
Lewis Hamilton chuan a team-mate Nico Rosberg-a'n Pathiannia tlan zawh tak Austrian Grand Prix a hnehna a chang chu a lawmpui thu leh hnehna chan phu takin hnehna a chang nia a hriat thu a sawi.
Spielberg tlankawngah khan kum 30-a upa Lewis hianpole position aṭangin intlansiak bul ṭan mah se kawng kawi hmasa berah Rosberg-a'n tlan pelin hnehna a chang zui. Nikum khan helai hmunah hian pakhatna a lo ni tawh bawk.
World champion nilai Hamilton chuan, "Nico khan chak a phu hle. Bul ka ṭan ṭha lo a, khami hnu khan lehpel leh ngei turin ka bei nasa hle. Mahse a harsa tawh hle a, ka theihtawp chhuah mah ila Rosberg kha a tlan ṭhat em avangin lehpelh ngaihna a awm tawh lo," tiin a sawi.
Intlansiak bul a ṭan ṭhat loh chhan sawiin British driver chuan, "Bul kan ṭan chiah khan car clutch kha a chiang lo tlat a, ka duh ang takin ka tlanchhuak chak thei lo. Beisei loh dan deuha thil a awm nghal hi chuan rilru hi a hnual mai ṭhin a, mahse rei lo te hnuah clutch-in ngai a awh leh theih avangin ka ti chhe lutuk hran loin ka hria," a ti.
Hamilton hi pitstop aṭanga a rawn tlan lut tur chu tiamchian aia chaka a rawn tlan avangin hrem a ni a, second nga in an ti khawtlai a ni.
Tun hnai intlansiak pali aṭanga vawi thum hnehna a chan chu lawmawm a tih thu sawi in German driver Rosberg chuan, "Kawng kawi hmasa ber leh a dawt chiahah khan Lewis-a'n min pelh mai loh nan ka fimkhur zual bik hle. Team khat ni mah ila champion duh ve ve kan nih avangin thianghlim takin kan inel a ngai a ni. Henhna ka chan theih avangin ka hlim tak zet," tiin a sawi ve bawk.
Tun season intlansiak vawi riat awm tawh aṭangin Hamilton hian driver championship-ah point 169 hmuin hma a hruai mek a, a hnuaichiahah hian point 159 hmutu Rosberg a awm mek a ni.
Tun season-ah intlansiak vawi 11 a la awm dawn a, beisei anga Ferrari leh McLaren team an chet ṭhat loh avangin Mercedes driver pahnihte hi an la inum chho zel in a rinawm. Amaherawhchu, Malaysian Grand Prix-a pakhatna dinhmun hauhtu Sebastain Vettel hi ngaihthah theih a la ni lo ang.