Villa keeper thar Emiliano Martinez

Premier League club Aston Villa chuan Arsenal aṭangin goalkeeper Emiliano Martinez an lalut fel ta. Argentine player man zat hi pound maktaduai 17 a ni a, a khelh ṭhat dan a zirin pound maktaduai thumin a san belh 

thei ang.

Kum 28 mi Martinez hian 2010 khan Gunners hi a zawm a, khelhna hmun nghet a chang mai lo. Khelmual chhunga inlan tam a duh avangin club hrang hrangah loan hmangin hun a lo hmang tawh a, tuna club thar a zawn chhan pawh inkhelh tam a duh vang a ni.

Season hmasa khan Bernd Leno inhliam karah Martinez hian season dang aiin match a khel tam, vawi 23 a inlan. FA Cup-ah a club hi a champion pui a, season thar khuhhawn nan Community Shield an lak ṭumin si ban a nghak bawk.

Mahse, German keeper Leno a dam tawh a, manager Mikel Arteta-a'n Leno hi a first choice a nih chhunzawm tur thu a tihchian avangin Martinez hi a chhuah phah, inkhelh duha chhuak a nih avangin North London club fan-ten dem loin lawmpuina thu an ziak nasa zawk.

Villa manager Dean Smith chuan Martinez chungchang sawiin, "Player ṭha tak, a vanglai hmang mek leh a theihna sang ber thlen hun hmang chho mek lakluh theih hi a vanneihthlak hle," tiin a sawi.

Tun nipui bazar chhungin Aston Villa hian striker Ollie Watkins leh defender Matty Cash te an lo lalut tawh a, keeper Martinez hi an player lak thar pathumna chiah a ni.