Rome khawpuiah Djokovic a champion
Novak Djokovic chuan Diego Schwartzman hnehin a vawi nga nan Italian Open nomawi a chawi a, tennis inelna ngaihhlut pahnihna ATP Masters 1000-ah vawi 36 ngawt a champion tlinna chiah niin, record nei ṭha ber a ni zui nghal bawk.
Thawhṭanni zan Rome khawpuia inkhelah world number 1 hian 7-5, 6-3 in hnehna a chang. US Open aṭanga paihthlak a nih hnua a tournament hmasa berah ropui takin hlawhtlinna a chang leh nghal tihna a ni.
August thla khan Western & Southern Open title lain Masters 1000 title lak hnem lamah Rafael Nadal (35 titles) a nih rual chiah. Grand Slam dawta inelna ngaihhlutah hian tunah chuan Nadal hi a khum zui nghal, an inel chhunzawm zel dawn niin a lang.
Novak a hrang
Centre Court-ah inkhel entu an luh phal a ni, inkar hlat deuh taka ṭhutna tur hmun siam niin mipa singles final hi a hmunah mi 1,000 chuangin an en - fans hmaah Djokovic-a'n inkhel bul a ṭan fuh
lo hle.
Set hmasa zawkah Nadal hnehtu Schwartzman-a'n 3-0 a hma hruaiin bul a ṭan fuh hle, dinhmun chhe zawka ngaih Novak zawkin a khingpui service chhuhsak zawnin minute 71 an khelh meuh chuan set hmasa latu zawkah a ṭang.
Boruak sangah world number 15 zawkin tihsual a ngah ṭan, a boruak a san zawh poh leh Djokovic erawhin nuam a ti zual emaw tih tur a ni - set hnuhnung zawkah chuan a service hloh ve bawk mah se harsa lutuk loin a tlang.
A lungawi
Tennis a khelh hun chhunga a nomawi 81-na chawitu Djokovic chuan, "Ka lawmna hi thuin a hrilhfiah zo lo, a nihna takah chuan tun tournament-ah hian a khel ṭha ber ka ni lo, mahse a hunah tak ka che fuh tlat si," tiin a sawi.
New York khawpui ang bawk khan Rome-ah pawh Novak hi a thinrim a insum zo lo. Quarterfinal an khelh ṭumin a thinrim insum zo lo chuan a racket chu leiah a vaw chhe vek a, player dang pawhin an lo tih ve ṭhin tawh a nih vangin hremna lian a tawk lem lo.
World ranking chhuak tharah Djokovic hi a chung berah a awm chhunzawm dawn, chawlh kar 287 chhung chu number 1 dinhmun a luah ta - Pete Sampras (286) a khum chiah, a chungah hian record nei ṭha ber Roger Federer (310) a la awm thung.