RIO olympic 2016 Bolt Bawk

Nimin zing khan Rio Olympic 200m final tlan a ni a, 100m a hnehna lo chang tawhtu Usain Bolt bawk a tlan chak leh ber. Jamaican sprinter ropui hian Rio-ah gold pahnih a lakna niin Olympic gold pariat a awrhna chiah a ni bawk.

Kum 29-a upa Bolt hian hnehna chang turin second 19.78 a mamawh a, a hnungah hian Canada tlangval Andre de Grasse (20.02 sec) leh France sprin--ter Christophe Le-maitre (20.12sec) te an thleng bawk.

Beijing 2008 leh London 2012-ah khan Bolt hian 100m, 200m leh 4x100m-ah te gold a lo hui fai vek tawh a, kuminah hian 4x100m a la hmabak - he inelnaah hian a hlawhtling leh a nih chuan Olympic vawi thuma inelna ngaia vawi thum champion 'treble treble' a ni dawn a ni.

Bolt chuan, "He hmun-ah hian inelna hau-tak hmachhawn turin ka lo kal a, hnehna chang tura ka hun hman zatah ka lawm rualin gold ka la thei kha ka lawmna ber chu a ni. Mi ṭhenkhatin infiammi ropuite zingah min sawi ri ve ṭhin a, a ropui berte zinga tel turin hmabak ka la nei," tiin Muhammad Ali leh Pele te nena huang khata awm tur chuan gold a la mamawh thu a sawi.

German khawpui Ber-lin-a neih 2009 World Championship-ah khan Bolt hian 200m hi second 19.19 chhunga tlan thlengin world record a lo siam tawh a, tun thlengin amah ngei pawhin a khum thei tawh rih lo. Record thar siam thei lo mah se Bolt hi khawvela tlan chak ber a nih zia chu inhrilh nawn ngai loa hriat sa vek a ni.

Jamaican tlangval hian kumin February thla khan 2017 World Championship zawh hunah intlansiak a chawlhsan tur thu a lo sawi tawh a, kumin hi a tan Olympic hnuhnung ber a ni tawh.