Olympic-a India hmeichhe zinga Silver medal la hmasa ber Sindhu
Pusarla Venkata Sindhu chuan India tan Olympic silver medal a dawng. Nizan khan Rio Olympic hmeichhe badminton final khelh a ni a, world number 10 Sindhu chu seeded pakhatna Carolina Marin lakah 2-1 in an chak lo.
Rio Olympic-ah India tan wrestler Sakshi Malik-i'n bronze medal a la tawh a, Zirtawpni zan hian badminton-a gold medal beiseina thamral mah se PV Sindhu thlen chin a ropui. Kum 21-a upa Hyderabad nula hi India hmeichhe zinga Olympic-a silver medal la hmasa ber a ni.
Hmeichhe inlenaah hian Japanese shuttler Nozomi Okuhara chuan bronze medal a dawng a, 2012 London Olympic gold medalist Chinese shuttler Li Xuerui chu hliam vangin pathumna inchuhnaah hian a inlan thei lo.
Inkhel chu
World number 1 Marin-i'n bul a ṭan ṭha zawk a, game hmasa berah 12-6 in hma a hruai nghal. Hyderabad nula a zam bik lo, zawi muanga hnaih hret hretin 19-19 a nih pui hnuah 21-19 in game latu zawkah a ṭang.
Game hnihnaah 2015 world champion Marin-i bawkin point a hmu hmasa leh a, 4-0 a hmahruai nghalin an inkarah point 8 a awm zui deuh reng hnuah 21-12 in game a la let.
Game hnuhnung berah Spanish shuttler bawkin bul a ṭan ṭha a, Marin-i hian 9-4 ten hma hruai hman mah se Sindhu hian tlawm mai tum loin 10-10 a ni hman. Amaherawhchu kum 23-a upa Marin-i'n a tawn hriat chhawr ṭangkai zuiin hun pawimawhah a chefuh a 21-15 in hnehna a chang.
Fanu hlu bik
Hyderabadi badminton star hian final lut tur hian Ningani zan khan All England Championship champion Nozomi Okuhara a lo hneh tawh a, world number 6 lakah hian harsatna tawk loin minute 49 chhung chauhin 21-19, 21-10 in hnehna a chang - India hmeichhe shuttler zinga Olympic final lut thei hmasa ber leh awmchhun a ni.
2008 Beijing Olympic-ah khan Abhinav Bindra chuan 10m Air Rifle-ah gold medal a lo dawng tawh a, ani hi India infiammi zinga mimal Olympic gold la thei hmasa ber a ni. Punjab tlangval angin kum 21-a upa Sindhu hian gold la thei chiah lo mah se badminton inelnaa silver la thei hmasa ber a nih avangin a thlen chin hi sawi nep theih a ni lo.
Indian hmeichhe zinga Olympic badminton inelna bika medal la hmasa ber ni turin 2012 London Olympic-ah khan Saina Nehwal chuan bronze medal a lo la tawh a, kuminah erawh world number 1 hlui hian a match hnihnaah Ukraine nula Marija Ulitina hneh loina tla thung.
Tu nge Sindhu?
July 5, 1995 khan Hyderabad, Telangana-ah Sindhu hi a lo piang a, a nu leh pa te hi volleyball player ni ṭhin an ni. A pa PV Ramana hian infiammi hmingṭha chawimawina Arjuna Award pawh a lo dawng tawh.
A naupan lai aṭangin sulhnu ṭha a nei chho thei nghal a, 2012 Asian Junior Championship leh 2011 Commonwealth Youth Game-ah te khan gold medal a lo dawng tawh. Senior level-ah pawh World Championship (2013, 2014) leh Asian Games (2014)-ah te bronze medal a lo la tawh bawk.
Intiat tawk
Sindhu leh Marin te hi vawi riat an inhmachhawn tawh a, 5-3 in Marin dinhmun a ṭha zawk. An intawn hmasak ber chu kum 2010 kha niin India nula hian hnehna a chang a, a ṭum hnihnaah pawh a chak leh.
Mahse, Marin hian a zawnin vawi thum hnehna a chang ve leh a, 2015 Denmark Open Superseries-ah Sindhu rawn chak ve leh mah se an intawn hnuhnung pahnih Hong Kong Open Superseries leh Olympic-ah Spanish shuttler Marin-i'n hnehna a chang.
Chong Wei a tlang
Nimin tlai vek khan mipa single semifinal khelh a ni a, world number 1 Lee Chong Wei chuan world number 3 Lin dan lakah 15-21, 21-11, 22-20 a hnehna changin final a lut.
China tlangval Lin Dan leh Malaysia fachuam Chong Wei te hi 2008 Beijing leh 2012 London final-ah khan an lo inhmawchhawn tawh a, hengah te hian kum 32-a upa Lin Dan a chungnung - tunah erawh inkhel hmuhnawm leh inhnehtawk takah Chong Wei hun a inherchhuak ve ta.
Semifinal lehlamah Chen Long leh Denmark tlangval Viktor Axelsen te an inhmachhawn bawk a, China aiawhtu Long hian minute 46 chhungin 21-14, 21-15 in hnehna a chang - mipa final hi Inrinni tlai dar 5:50-ah khelh a ni ang.
silver Medal Kalkawng
Group stage
Sindhu 2 - 0 Laura Sarosi (HUN)
(21-8, 21-9)
Sindhu 2 - 1 Michelle Li (CAN)
(19-21, 21-15, 21-17)
Last 16
Sindhu 2 - 0 Tai Tzu-ying (TPE)
(21-13, 21-15)
Quarterfinal
Sindhu 2 - 0 Wang Yihan (CHN)
(22-20, 21-19)
Semifinal
Sindhu 2 - 0 Nozomi Okuhara (JPN)
(21-19, 21-10)
Final
Sindhu 1 - 2 Carolina Marin (ESP)
(21-19, 12-21, 15-21)