Brazil tan phuba lakna hun

FIFA World Cup 2014-ah khan Germany chuan semifinal-ah a thlengtu Brazil 7-1 in an sawp a, an khawtualah ngei Brazil player-te tih mualphoin an awm a, champion inbeisei Brazil fan-te mittui a hul thei lo a, an rilru na a dam thei lo.

Kum hnih a liam a, Brazil-in khawvel hmaa mualpho tirtu German ho lakah phuba lakna remchang an nei dawn - Pathianni zing dar 2:00-ah Germany nen Olympic gold medal inchuhin an inkhel ang.

Mipui 78,000 lenna Maracana stadium-a final khel tur Brazil hian 1984, 1988 leh 2012 Olympic football-ah final an lut tawh a, an chak lo vek thung - naktuk zingah thawnthu hlui thai chhiat tumin an khel dawn a, a hmuhnawm ang.

Brazil coach Rogerio Micale chuan, "Boruak sang tak hnuaiah kan khel dawn a, mah se kan lo tih tawh angin nuam ti takin kan khel ang, " tiin Germany chu hlauhthawnna nei loa an hmachhawn tur thu a sawi.

Micale chuan sawi chhunzawmin, "Rim taka thawk chunga kan theihna zawng zawng nen result kan hlawhchhuah ṭhin ang khan kan bei chhunzawm ang. Kan theihna zawng zawng kan pe dawn a ni. Keini football ve chu thiamna chauh a ni lo a, thlantui tam tak telna football a ni - heivang tak hian gold pawh beisei ngam kan ni," tiin theihtawp chhuah chunga an khelh tur thu a sawi.