Arsenal hmachhawn tur Foxes

Zanin dar 10:00 hian King Power Stadium-ah Arsenal leh Leicester City an inhmachhawn dawn a, club pahnih tan inkhel pawimawh bik a ni dawn - Liverpool an hneh loh ṭuma Emirates Stadium a chhuahsan dawna fan ṭhenkhat ten an 'boo' tawh Gunners manager Arsene Wenger tan a pawimawh zual bik ang.

Tlar hnung pawp thawm nan Wenger-a'n player lakluhna tur sum an neih thu sawi mah se nimin tlai thleng khan French pachal hian a sum bawm a la hawng lo. Premier League cham-pion manager Claudio Ranieri erawhin PFA Players' Player of the Year Riyad Mahrez chu kum li chhung atan a thlung nghet thei thung a, match thum khel thei lo tura hrem defender Robert Huth a lo kir tawh bawk ang.

Euro 2016 khelh vanga chawlh nei rei bik Laurent Koscielny lo kir tur hian Gunners fan-te thlamuanna a thlen a rinawm a, striker Olivier Gi-roud leh playmaker Mesut Ozil te pawhin Foxes an hmachhawn thei tawh tura beisei a ni. Hetihlai hian Liverpool an hmachhawn ṭuma hliam Aaron Ramsey leh Alex Iwobi te erawh chawlhkar thum vel an chawlh a ngai dawn thung.

Club pahnihte hi an league match hmasa berah an chak lo ve ve a, Gunners-in 4-3 a Reds an ngam loh laiin Leicester hi Hull City lakah 2-1 in an tlawm bawk - chak lo nawn zawk nih chu thih hrehin an hreh ang!

North London club hian Leicester hi an hu-phurh dawn lo, an intawn hnuhnung vawi 19-ah chak loh an nei miah lo a, vawi 13 hnehna changin ṭum ruk an inhnehtawk - season hmasa khan league match vawi hnih an intawnah Wenger-a naute an chak ve ve bawk. Mahse, season tluana kan thlir erawh chuan match 38 khelh aṭangin Foxes-in point an hmu hnem zawk a, an hnuaia season hmang zotu club hi an huphurh bik lo tawp ang.

Arsenal boss Wenger chuan, "Sum hman tur kan nei tih ka sawi duh, mahse a pawimawh zawk chu kan hmanna a dik em tih hi a ni. Sum hmanga inlei lian nih hi a ropui lo a, player ṭha lei nana sum hman erawh a ṭha thung - hei hi kan club kalphung a ni. Player ṭhenkhat kan hnena khelh chak an awm a, min chhuahsan tawh tam tak pawhin rawn kir leh an duh. Player lakluh hrim hrim hi thil harsa a ni lo," tiin a sawi.

Leicester manager Claudio Ranieri chuan, "Season hmasa khan a chak lo lamah vawi hnih kan ṭang a, tunah chuan kan inpeih tawh e. Arsenal league match hmasa ber kha ka en a, khel ṭha viau mah se an chak lohna lai ka hmu. Keni lam chu kan thupui a la pangngai reng a, beiseina kan neih ti hlawhtling turin kan thawkrim chhunzawm ang," tiin an khingpui chak lohna lai a hriat thu a sawi.