RG Stadium-ah Ramhlun North fiahna

I Day Football 2016-ah Ramhlun North FC-in final an lut mai ni loin champion zui ta Aizawl FC an khing tawk a, vawiin hi MPL kai thar tan fiahna a ni.

Lalruatliana Sailo (Tawia) hote hian tlai dar 3:00-ah first division club Venghlui FC lakah an chetṭhat chhawm nun zel an tum dawn a, chhun dar 12:30-ah Chanmari West FC leh Chawnpui FC te an inkhel bawk ang.

Samsung 3:16 Plan Solution MFA Super Cup hi Lammualah khelh ni mah se vawiin inkhel bik erawh RG Stadium, Mualpuiah khelh a ni dawn.

Venghlui FC leh Chawnpui FC hi last 16 lut turin RG Stadium-ah ahn inlan tawh a, MPL club erawhin Lammualah I Day Football an khelh avangin khelhna hmun sawn hi division hniam zawk club tan thu lawmawm a ni.

An tlo ang em?

Ramhlun North FC-in I Day Football-ah Zo United chu goal awm loa an inhnehtawkpui hnuin Shillong Lajong FC lakah 1-4 in an mualpho. MPL kaithar hian I League club laka chak loh hi insiamṭhat nan hmangin Dinthar FC, Bethlehem VT FC leh Chanmari FC te an hneh zui a, final-a Aizawl FC laka an chak loh dan pawh penalty shootout a ni.

Tawia'n a player neih angte a rem thiam a, MPL1-a Dinthar FC champion puitu Zosangliana (Chhaia) pawh chuai tawh angin sawi mah se I Day Football-a best player ni tur khawpin khelmualah a hmuhnawm.

AFC B Licence nei coach Tawia chuan, "Football-ah chak chiang a awm lo. Chanmari pawh khan Zarkawt lakah khan an tha thlah se chesual thei an ni. Kei ni tan inkhel pawimawh tak a ni dawn a, kan chet ṭhat chhoh kan chhawm nun theih leh theih loh fiahna a ni ang," tiin Vanglaini palai a hrilh.

Venghlui an duai lo

Team ṭhang duang tak Venghlui FC-in last 16 thleng turin Project FC (Kolasib), Hnah-lan GSA leh Chaltlang FC te an hneh.

Team manager C. Zohming-liana chuan, "Ramhlun North hian I Day Football final an thlen vangin phur viau mah se anni tum hi kan hreh lo. Fix-ture hi pawh ṭhat leh ṭhat loh hi kan thuneihna ni se keini chuan pawh ṭhat kan duh tawh lo. Kan khingpuite hi an ṭha tih hre mah ila, hneh theih dan kawng a awmin kan hria," tiin an hlau bik lo.

Venghlui FC tan hian Zo United leh FC Kulikawn tan pawha lo khel tawh James Lal-hming-sanga chu player pawimawh a ni a, Tuikual South tlangval Lalremruata bakah KC Zothanchama, KC Larchhuak-mawia leh captain B. Lalhruaizela te last 16 an thlenna kawngah an ṭangkai hle.

Quarterfinal-ah West Warrior?

Chanmari West FC-in I Day Football-ah quarterfinal an thleng lo chungin team ṭha an ni tih a hriat tawh a, first division club Chawnpui tan hneh an harsa khawp ang.

West Warrior coach HC Zarzoliana chuan, "I Day Football ai chuan hma kan sawn tawh. Chawnpui FC lakah a chetsual theih avangin first eleven pawh uluk takin kan thlang ang. Division hniam zawk an nih vanga inthlahdah ngawt a thiang lo," tiin Vanglaini palai a hrilh.

Chawnpuiin an cho

Chawnpui FC tan Chanmari West-ah pawh lo khel tawh H. Lalzawmliana chu hmatawngah a awm dawn a, an chak dawn a nih chuan Chhinga Veng aṭanga an lakluh MPL U17 best forward pawh lo ni tawh Lalrinhlua leh defender Lalrohlua te an pawimawh bawk ang.

Chawnpui manager Richard Lalduhsanga chuan, "Draw kan neih dawn khan kan captain Lalramnghaka nen kan kal a, kan kalkawngah Chanmari West hmachhawn a châk ber thu min hrilh a, a duh ber a pawtfuh bawk. Hei vang hian kan player-te chuan an hlau lo turah kan ngai a, chutihrualin MPL club hi team
ṭha tak an nih avangin chak tur chuan kan beih ve viau a ngai ang," tiin MPL club an hlauh bik loh thu a sawi.