La Liga an Ṭan dawn ta Barca leh Real inlan nghal dawn
Zaninah La Liga khelh ṭan a ni dawn a, a ṭan zanah cham-pion lai Barcelona chuan dar 9:45-ah Real Betis an mikhual nghal ang. Catalan club elpui Madrid khaw club pahnih erawh Pathianni zanah an inlan dawn thung. Real Madrid chuan naktuk zan dar 11:45-ah Real Sociedad an lenchilh ang a, Atletico Madrid chuan La Liga kai thar Deportivo Alaves an mikhual thung ang.
Barca tan fiahna
Barcelona-in Spanish Su-per Cup nomawi chawi turin Sevilla chu inkhel pahnih belh-khawmah 5-0 in an sawp a, chawlh rei lo te chhungin an thiam an la theihnghilh hman lo tih a lang chiang hle.
Lionel Messi, Luis Suarez leh Neymar ten season hman zawh takah league goal 90 zet an khung a, MSN zingah Olympic football khelh vangin Neymar la inlan thei dawn lo mah se Suarez leh Messi ringawt pawh hi Betis tlarhnung tan muttui lohna tham a ni!
Catalan club manager Luis Enrique-a'n Barcelona a enkawl hnua an squad ṭhat ber ṭum niin a sawi - nipui bazar-ah midfield ti chak turin pound maktaduai 47.1 man Andre Gomes leh pound maktaduai 2.7 man Denis Suarez te a lalut a, tlar hnungah Dani Alves chan mah se hmabak nei eng Samuel Umtiti (£21.2m) leh Lucas Digne (£14m) te a neih belh bawk avangin a squad neihsa nena ngaihtuahin Spanish manager hi a ṭawngvai satliah lo tih a hriat.
Zidane tan fiahna
French manager Zinedine Zidane-a'n season laklawhah Real Madrid enkawlin thla li chhung lekin Champions League nomawi a chawipui a, tun season ṭan nan UEFA Super Cup nomawi an chawi leh tawh bawk - Zidane-a tan tun season hi fiahna tak tak in-
ṭan hun tur chu a ni a, kum 2012 hnua league nomawi la chawi leh lo club champion pui tum hi 'chona' a ni.
Real boss Zidane-a'n nipui bazar-ah pound maktaduai 24 man Alvaro Morata chiah a la lalut a, player langsar zingah Jese Rodriguez chu Paris St Germain lamah pound maktaduai 21-in a chhuahtir bawk. Kum 44-a upa manager hian a squad neihlai a ṭhat tawk thu leh inlei belh an tum loh thu a sawi.
French legend thusawi hi
ṭawmpui loh harsa tak a ni. Tlar hmaa khel turin lei thar Morata bakah Cristiano Ronaldo, Gareth Bale leh Karim Benzema an nei a, Real-in chhuahtir an tum nia sawi James Rodriguez chu Zidane-a'n a chhuah loh tur thu a sawi bawk. Hetihrual hian hliam vangin Benzema a inlan theih a la beiseiawm loh a, hliam vang thoin Ronaldo chuan season bul a ṭan beisei a ni lo.
Mahse, Gareth Bale a inlan theih dawn miau avangin La Liga-a an match hmasa bera Real Madrid hmachhawn hi Real Sociedad tan chuan ṭawng-
ṭai chhanna a ni lo tawp ang.
Ngaihthah thiang lo
La Liga sawi apiangin Bar-celona leh Real Madrid chu champion tura beisei ni ṭhin mah se Atletico Madrid hi sawi hmaih thiang an ni lo a, theihnghilh a thiang lo. Atletico Madrid president Enrique Cerezo-a'n tun ang em ema Atletico squad an la
ṭhat ngai loh thu a sawi a, a thu-sawi hnial ngam an tam kher lo ang.
Diego Simeone-a'n nipui bazar-ah pound maktaduai 27 man striker Kevin Gamerio leh pound maktaduai 21.25 man attacking midfielder Nico-las Gaitan te a lalut a, striker Fernando Torres, winger Yannick Carrasco leh French forward Antoine Griezmann te an neihsa bawk avangin tlar hmaah lungphanna tur an nei lo.
La Liga kaithar Deportivo Alaves hmachhawn tur zingah Euro khelh chauh vangin Griezmann chu chhawr a la ni dawn lo a, Spanish chanchinbu lar Marca chuan Atletico player thar pahnih Gameiro leh Gaitan te chu tlar hmaah an inkawp dawn niin an tarlang.