West Ham leh Astra inhnehtawk

Ningani zan khan West Ham leh Romanian club FC Astra Giurgiu ten Europa League playoff first leg an khel a, club pahnih hian goal khat ve ve khungin an inhnehtawk. Karleh Ningani khian London Sta-dium-ah second leg khelh a ni ang.

West Ham manager Slaven Bilic-a'n Premier League ṭan nia Chelsea 2-1 a hneh lotu aṭangin player pariat ngawt a siksawi a, star player Dimitri Payet phei chu Pathianni zan dar 8:30-a Bour-nemouth hmachhawn turin London-ah a hahchawlh tir daih. Loan hmanga lakluh thar Jonathan Calleri leh winger Gokhan Tore te chuan an club thar tan an match hmasa ber an khel.

Stadionul Marin Anastasovici-a inkhelah first half tawp hma chiahin Giurgiu defender Cristian Sapunaru handball vangin West Ham-in penalty an hmuh chu midfielder Mark Noble-a'n goal-ah a chantir.

Second half-ah team pahnih an inkhel tawk a, Slaven Bilic-a naute hian an goal hnihna khung theih hun an neih chu Michail Antonio-a'n a chhawr ṭangkai theih loh hnuah mualneitu lam tan forward Denis Alibec chuan an siphurh a sut.

West Ham manager Slaven Bilic chuan, "Result chhia niin ka hre lo, player naupang zawk ten khelhna hmun an chang a, an tan tawnhriat neihna hun ṭha a ni. Second leg chu kan khemuala khelh tur a nih tawh avangin kan chak ngei ka ring," tiin a sawi.