Manchester City-ah Iheanacho a nghet

Manchester City rawlthar striker duhawm Kelechi Iheanacho chuan Etihad Stadium-a a contract neihlai chu kum hnihin a pawtsei a, kum 19-a upa striker hian 2021 thleng City tan a khel dawn tihna a ni.

Nigerian rawlthar hian season hman zawh takah khan City tan inelna hrang hrangah match 36 inlanin heng zinga match 25 hi substitute bench aṭangin a ni a, heti chung hian goal 14 lai a khung.

City manager thar Pep Guar-diola chuan, "Kelechi hi goal keng tel striker kan sawi ṭhin ang kha a ni. City ka enkawl hma khan a chanchin hi ka hre daih tawh a, mah se he hmun ka lo thlen khan a theihna hian ka rilru an luah lehzual a ni," a ti.

Barcelona boss hlui chuan sawi chhunzawmin, "Iheanacho hi nun-chang ṭha, thil thlir thiam leh theihna sang tak nei a ni a, a sang thei ang ber thleng chunga a thiamna tak tak pho chhuak thei tura kan puih theih ka beisei a ni," tiin a sawi.