Nadal hi hneh theih a ni - Djokovic

Italian Open an khel zo chauh a ni a, inelna lian French Open chu Sepember 28 aṭangin khelh chhunzawm nghal a ni dawn. Rome khawpuia a champion hnu lawkah Novak Djokovic chuan Rafael Nadal chu clay court-ah player dang tana hneh theih a nih ve thu a sawi.

Inkharkhip hnua a vawi khat nan Nadal-a'n tournament a khel ve leh chauh a, quarterfinal-ah seeded pariatna Diego Schwartzman hneh loin a tla. French Open-ah erawh champion tura rinkai ber a ni dawn tho. Djokovic chuan, "Rome-ah Rafa hi chak lo mah se Paris-ah chuan rinkai ber a ni tho, a thil lo tih tawh leh sulhnu thlirlet chuan midang chunga leng a ni. Mahse, Diego khan Nadal hi clay-ah hneh theih a nihzia a lantir ve tlat," a ti.

French Open thlir zuiin Novak chuan, "Final-ah Nadal a inkhel dawn em tih vel chu ka ngaihtuah duh lo, nomawi chawi thei dinhmunah ka ding ve dawn em tih chu ka rilru luahtu a ni zawk. Player dang tan chuan final kan lut phak em tih hi kan beisei san theih chu a ni," tiin Nadal a dah sang hle. 'King of Clay' tih hiala hminglem an vuahsak Nadal hian French Open nomawi hi vawi 12 teh meuh a chawi tawh, a rualpui player dang tan chuan hmun a kian lo tluk a ni. Mipa leh hmeichhe player zingah pawh inelna lian pakhata player mal champion hnem ber a ni.