RIO olympic 2016 Hockey champion Argentina

Argentina chu an ram chanchina a vawi khat nan Olympic mipa hockey champion an ni. Rio Olympic gold medal la turin Argentina hian Belgium lakah 4-2 in hnehna an chang a ni.

Ningani zana final inkhelah Belgium tan Tanguy Cosyns chuan goal hmahruai khung mah se Pablo Ibarra, Ignacio Ortiz leh Gonzalo Peillat te hmangin Argentina-in an chhang let. Red Lions tan Gauthier Boccard chuan an si phurh sut ṭhen ve leh mah se hun tawp dawnah Agustin Mazzilli-a'n an chak nemnghehna goal a khung.

Tun hmain Argentina hian Olympic mipa hockey-ah hian final an la lut ngai lo, tun ṭumah hian champion lai Germany chu semifinal-ah 5-2 in an hneh a - an champion zui hi a mak lo. Chak lo zawk Belgium pawhin kum 1920-a silver medal an lak hnua Olympic medal an lak lehna hmasa ber an tawng ve bawk.

Bronze medal in-chuh-naah Germany leh Netherlands te hun pang-ngaiah 1-1 a an inhnehtawk hnuin penalty shootout-ah Germany 4-3 in an chak.