Palace dawrna Reds-in an pawm

Liverpool chuan Crystal Palace-in pound maktaduai 27-a Christian Benteke lei an dilna chu an pawm. London club hian Belgian striker manah hian pound maktaduai 27 hi an pe phawt ang a, a chet ṭhat dan a zirin a man hi pound maktaduai 30 chuanga pung thei tura tih a ni.

Kum 25-a upa striker hian ni-min khan Palace innghahna London khawpui chu medical leh mimal thila indawr turin a pan nghal a, he thuziak i chhiar meuh chuan Alan Pardew-a enkawl team tan hian contract a ziak tawh hial mai thei.

Benteke hi Palace player manto ber a ni dawn tihna a ni. Eagles (Palace sawina) hian July khan Andros Townsend chu Newcastle United aṭangin pound maktaduai 13-in an lalut a, English winger hi an player manto ber a ni rih.

Aston Villa striker hlui hian July 2015 khan Reds hi pound maktaduai 32.5-in a zawm a, Brendan Rodgers ban a nih hnuah beisei anga hmun a chan tam tawk loh avangin Anfield a chhuahsan dawn ta a ni.

Belgium tan vawi 26 inlana goal ruk khungtu striker hian season hman zawh takah khan Liverpool tan inelna hrang hrangah match 42 inlanin goal 10 a khung a, Jurgen Klopp-a'n Liverpool a enkawl hnuah league match riatah chiah inkhel bul a ṭan.