Premier League club lian an inlan kim dawn

Zanin Premier League-ah Manchester City, Liverpool, Tottenham Hotspur leh Chelsea an inlan kim vek dawn a, champion tum ngam ṭhah an nih avangin zanin an inkhel tur hi a nghahhlelhawm hle.

Manchester City, Liverpool leh Chelsea ten an match hmasa berah an khingpui an hneh vek laiin Tottenham Hotspur erawhin an match hmasa berah Everton an inhnehtawkpui a, London club tan pressure a sang ber dawn.

Hart chhuah an phal

Vawiin tlai dar 5:00-ah Man City hian Stoke City an lenchilh dawn a, inkhel hmuhnawm beisei ngam a ni. Manchester City-in an match hmasa berah vannei takin Sunderland chu 2-1 in an hneh a, Champions League playoff-ah penalty vawi hnih lai pet goal lo chungin Romanian club Steaua Bucharest chu 5-0 in an sawp thung.

English media lamin Pep Guardiola hnuaia City hmasawnna lam aiin Joe Hart leh Yaya Toure hmalam hun an ngaihven a, England no. 1 keeper leh Ivorian midfielder te hi Spanish manager hnuaiah khelhna hun pek an la ni lo.

English keeper chungchanga zawhna chhangin Pep chuan, "Player-te hlimna ka ngai pawimawh ber a, chhuah an duh chuan chelh ka tum lo. Player zawng zawng hian contract an nei vek a, chhuah duh loh zawng chu an awm ang. An vaiin ka be tawh a, an hmalam hun chungchang chu ka hrilhfiah chiang. Ka bula awm duh ho nen chuan theihtawp kan chhuah ho ang," tiin a sawi. Spanish manager hian Hart hi sweeper-keeper ni turin a ṭha tawk loa a ngaih bakah inzir chawp tur chuan a tlai hret tawhah a ngai bawk. City tan Willy Caballero vawi hnih a inlan tawh a, Barcelona keeper Claudio Bravo leh English club hi an inhnaih tawh hle nia sawi a awm bawk.

Yaya Toure chungchang sawi chhunzawmin Pep chuan, "Yaya hian khelh a duh a, amah pawh hi khelmual chhunga inlan turin ka duhsak hle. Amaherawhchu ball a chan loh lai a awmze nei zawka team tan a khelh a thiam hunah a inlan ang," tiin a khelh dun dan a la hriatthiam loh thu a sawi.

City boss hian inhliam vanga la inlan thei lo Leroy Sane chu international break zawhah a inlan theih a beisei thu a sawi a, Ilkay Gundogan pawhin inkhel turin kar hnih chiah a mamawh tawh thu sawi lang a, Vincent Kompany pawhin hahdam deuhin training a zawm ṭan tawh thu a sawi bawk.

Season ṭan hmaa rih tur pangngai baka rit nia an sawi French midfielder Samir Nasri chuan Turkish club Besiktas chu loan-in a zawm dawn tih sawi a awm bawk.

Mane a chiang lo

Liverpool-in an match hmasa berah Arsenal chu khualmualah 4-3 in an hneh a, Reds tana a match hmasa berah Sadio Mane-a'n game hmuhnawm khelin goal ropui a khung bawk. Mahse, pound maktaduai 34 man winger hi training naa a dar hliam vangin zanin dar 7:30-a Reds-in Burnley an lenchilh hunah a inlan theih dawn leh dawn loh a chiang lo.

Reds manager Jurgen Klopp chuan, "Boruaka ball inchuhna lamah Mane hi leiah a tla sual a, hliam na tak a ni lo. Burnley a hmachhawn theih dawn leh dawn loh sawi theih a ni lo a, mah se hun rei tak chawlhpui tur chi erawh a ni lo," a ti a, Reds fan-te tan thawk huaina tham a ni.

Season hmasa aṭanga sawisel tawk tawh Reds left-back Alberto Moreno-a'n Gunners lakah ṭul lo takin penalty a chawi a, Spanish defender hian sawisel a tawk nasa hle. Mahse Klopp chuan a nau hi chhanin, "Midang ngaihdanah ka buai lo a, ka khelhtir chuan khelhtir chhan ka nei tihna a ni mai," tiin player chhan a ti na hle.

Chhuanlam zawng Pochettino?

Tottenham-in zanin dar 7:30-ah Crystal Palace an mikhual dawn a, Alan Pardew-a naute mikhual tur Mauricio Pochettino chuan hliam vangin a goalkeeper Hugo Lloris a chhawr thei dawn lo. France international keeper hian an match hmasa bera Everton nen 1-1 a an inhnehtawk ṭumin a malpuiah hliam a tuar a ni.

Argentine manager chuan a player inhliam chungchang sawiin, "Euro khelh zawh hnu lawkah chhawr an ngai leh a, chawlh tir ila, chak lo ila, nasa taka sawisel ka ni leh si ang. Player-te hi khawl an ni bik lo a, chaw ṭha ei a, hahdam taka awm te pawh an mamawh ve a ni," tiin a player zingah Euro 2016 khelh vanga chau an la tam thu a sawi a, a besei ang result a nei thei rih lo.

Pochettino chuan sawi chhunzawmin, "Inelna tak tak hmachhawn turin an inpeih a ngai a, pawisa pek vang maia duh hun huna chhawr tum tur a ni lo," tiin a sawi bawk a, an match hmasa berah an chak zawh tawh loh avangin Crystal Palace lakah erawh 'chhuanlam' hman a thiang tawh lo ang.

Khualmualah Chelsea

Chelsea manager thar Antonio Conte-a'n a Premier League match hmasa bera West Ham a hmachhawn hmain London Derby-a bul ṭan chu hna hautak tak a nih thu sawi mah se 2-1 in Hammers hi an paltlang a, zanin dar 7:30-ah Watford a lenchilh dawn.

Italian manager hian Hammers an hneh ṭumin uar takin an goal khung a lawm a, hemi chungchang hi nizana lama press conference-ah sawiin, "Kei chu tih takzeta thil ti ṭhin ka ni. Ka player-te nen kan khel a, an tawn ang tawn ve hi ka duh. Goal pawimawh a luh phei chuan ka awm dan hi ka thup thiam lo, mak inti a ni mai thei mah se hei hi ka mizia chu a ni. Kan team pawh hian season ṭha tak hman kan duh chuan chak duhna thinlung kan neih zel a ṭul a ni," a ti.

Blues hmachhawn tur Watford hian defender Younes Kaboul (Sunderland) leh midfielder Roberto Pereyra (Juventus) an lalut dawn a (he thu i chhiar meuh chuan an lut tawh hial ang), amaherawhchu Chelsea an hmachhawn hman dawn em tih a la hriat loh. Watford hian London club hi league-a an hamchhawn hnuhnung 15-ah vawi khat chiah an hneh a, chu pawh chu kum 17 liam ta khan a ni. History leh team dinhmun thlirin Italian manager Conte kaihhruaina hnuaia khel Chelsea an chak a beiseiawm zawk.