Min zawh ang hi Pep an zawt ve lo - Klopp

Liverpool boss Jurgen Klopp chuan a contract zawh huna a tih tur an zawt reng chu a nin thu a sawi a, "Pep Guardiola hi chu a contract zawh huna a tih tur an zawt ve ngai lo reng reng," tiin a sawi!

October 2015-a Liverpool zawmtu Klopp hian Anfield-ah kum 2024 thleng cham turin contract a la nei a, Pep hian tun season bak Etihad Stadium-a cham turin contract a nei tawh lo thung. 

Klopp chuan, "Liverpool-a ka contract ka hman zawh huna ka tih tur min zawt hi an tam em em a, Pep Guardiola erawh an zawt ve ngai lo. Kum li contract ka la nei a, football-ah chuan kum li chu 'chatuan' ang mai a ni. 

"Hetih hun chhung hian thil tam tak a thleng thei a, ka thlirdanah chuan contract ziah thar leh thar loh ka ngaihtuah ka ring. Mahse, contract hi ka ziak thar lo a nih chuan chawlh ka la ang. Liverpool ka chhuahsan hunah chuan hna dang thawk nghal loin kum khat tal chawlh ka la ang," tiin a sawi. 

Klopp hian Liverpool a enkawl hmain Borussia Dortmund-ah hlawhtlinna ropui tak a chang a, German club tan hian Bundesliga nomawi pahnih a chawi bakah Champions League final a luhpui. 

German club hi an fan-te avangin hriat an hlawh a, hei tak hi Liverpool nen an inanna ni pawhin an sawi ṭhin. Mahse, Klopp chuan Liverpool fans chu Dortmund fans aia an la ṭhat zawk cheu thu a sawi. 

Kum 53 mi coach chuan, "Germany kan thlir a nih chuan Borussia Dortmund khelmualah thawm a ṭha ber a, Liverpool nen kan khaikhin dawn a nih erawh chuan Reds hi a chunglamah an la awm cheu a ni," tiin a club enkawl mek a fak. 

Klopp hian Liverpool-a enkawl hnuah Champions League, Premier League, FIFA Club World Cup leh UEFA Super Cup nomawi a chawi tawh a, Reds fans zingah a tla na hle.