Hmeichhe champion Halep

Simona Halep pawhin French Open inbuatsaihna a hmang ṭha hle. Romanian nula hian a vawi khat nana Italian Open nomawi chawi tur hian Karolina Pliskova chu 6-0, 2-1 in a hneh.

Hmeichhe singles-ah hian rinkai pahnihin final an lut, seeded pakhatna Halep a vannei zawk thung. Seeded pahnihna Pliskova hi set hnihna an khelh laiin hnungzâng hnuai lam na vangin a inkhel chhunzawm thei tawh lo.

Halep hian 2018 khan French Open title a la, kuminah hian coronavirus len hma nena chhutin a match hnuhnung 14-ah a chak vek a, clay court inelna lian atan inrintawkna a ngah khawp ang.

World number 2 Halep chuan, "Hetianga final khelh zawh theih loh hi kan duh leh beisei dan a ni lo. Pliskova hi dam leh thuai turin ka duhsak a, French Open final-ah kan intawn leh ngei ka beisei," tiin a khingpui chu dam vat turin a duh.

Grand Slam vawi hnih champion tawh Halep hi hripui leng vangin US Open-ah a inlan lo - French Open erawh a khel dawn. Roland Garros-ah hian world number 1 Ashleigh Barty a tel dawn loh avangin Halep hian seeded pakhatna a chang thei dawn.