Penalty vawi 24 an pet, Bournemouth an chak

League Cup tia hriat lar Carabao Cup-ah Bournemouth leh Crystal Palace te hun pangngaiah goal awm loin an inhnehtawk a, penalty hmanga chak zawk zawn niin player zawng zawngin penalty an pet kim vek hnuah pet nawn lehin Cherries 11-10 in an vannei. 

Bournemouth hi season liam ta khan Premier League-ah 18-na niin an relegate a, Eddie Howe banin manager thar Jason Tindall hnuaiah an khel. Tindall-a hnuaiah hian Championship match hmasa berah 3-2 in Blackburn Rovers an hneh. Crystal Palace pawhin Premier League match hmasa berah Southampton 1-0 in an hneh ve bawk.

League Cup hi Premier League leh FA Cup hnuaia dah a ni a, Eagles pawhin Saints an hneh ṭuma goal awmchhun khungtu Wilfried Zaha an chhawr lo. Dean Court-ah minute 90 chhungin mualneitu Cherries-in inkhel thunun zawk mah se goal hmuh tur a awm lo. Extra time a awm loh avangin penalty shootout hmanga chak zawk zawn nghal a ni.

Bournemouth tan David Brooks a rawn pen chhuak hmasa ber a, Palace tan penalty specialist Luka Milivojevic a rawn pen chhuak bawk. Outfield player 10-in an pet goal vek a, vawi 10 pet zawhah 10-10 in an inhnehtawk. Palace keeper Wayne Hennessey-a'n Cherries keeper Asmir Begovic pet dang mah se a pet over avangin player zawng zawng pet zawhah chak zawk an la awm lo.

Sudden Death hmangin penalty an pet chhunzawm a, team pahnihin bul ṭantu ngai bawk an thlang. Cherries midfielder Brooks-a'n a pet goal laiin Milivojevic-a pet chu Begovic-a'n a dansak. Penalty vawi 24 pet zawhah Championship club Bournemouth-in Premier League club Eagles 11-10 in an hneh.

Crystal Palace boss Roy Hodgson chuan, "Penalty zawng zawng kha a goal vek teuh hle mai, team pahnihin football hmuhnawmna an pho chhuak. Bourenmouth an chak avangin ka lawmpui a, chak an phu a, Man City nen an inkhelh turah duhsakna ka hlan. Second round chauh kan khelh laia third round-a kan hmachhawn tur kan hre lawk hi ṭha ka ti lo. Hemi puan lawk hi a ṭhatna ka man pha lo," tiin Cherries a lawmpui thu a sawi a, third round fixtures an pholang hma lutuk chu ṭha lo a tih thu a sawi tel bawk.

Bournemouth hian champion lai Manchester City an hmachhawn dawn. Cherries manager Jason Tindall chuan, "Manager leh player aṭanga thlirin team ṭha ber zel tum ka duh ṭhin. Manchester City hmachhawn hi a hautak dawn a, chona lian tak min pe a ni. Player tan pawh Man City hmaah an thiamna leh theihna pholanna hun ṭha tak a ni ang," tiin a sawi.

League Cup second round-ah hian match 25 a awm a, team 50 an tel. Third round-ah second round-a chakte bakah tun season-a European Competition khel tur team pasarih Liverpool, Manchester City, Manchester United, Chelsea, Leicester City, Tottenham Hotspur leh Arsenal te an inlan ang.