UN hotuin thawhhonna ṭha nei turin a ngen

United Nations (UN) secretary general Antonio Guterres chuan Thawhṭanni khan khawvelah thawh­honna ṭha a awm theih nan ram hrang hrangte inlungrual turin a ngen.

Thawhṭanni khan video conference hmangin United Nations din champha vawi 75-na lo thleng tur puala inkhawm neih a ni a, he hunah hian khawvel ram hrang hrang hruaitute an inhmuh­khawm a ni. Video hmanga inhmuhkhawmnaah hian Covid-19 dona kawngah leh khawvel economy chhe zel siamṭhat a nih theih nana khawvel ram hrang hrangte thawhho dan turte sawi a ni.

He hunah hian Guterres chuan khawvelin hun harsa a tawh mek thu sawiin, ram hrang hrangte chu inlungrual a, hmasawn zawnga ke pen turin a sawm. "Khawvel chuan harsatna hrang hrang a tawk mek a, heng kan thil tawh mekte hneh thei tur chuan tualchhunga pawl zawng zawngte thlengin an pawimawh vek a ni," tiin Guterres chuan a sawi.

Remna leh muanna, dikna leh felna, intlukna leh zahawmnate a awm theih nana hmalakna chu United Nations thil tum a nih thu Guterres chuan a sawi a, kum tam tak chhung chu ram lian leh thil tithei te inkarah indona a thlen loh thu Guterres chuan sawiin, hei hi UN-in a thil tum a tih hlawhtlinte zinga mi a ni, a ti.