Stan Wawrinka a chak lo

French Open inbuatsaih nan Italian Open khelh ṭan a ni a, player langsar Stan Wawrinka chu a match hmasa berah rawlthar Lorenzo Musetti hneh loin a zinkawng a tawp nghal.

Thawhlehni zan inkhelah Grand Slam vawi thum champion tawh hi 6-0, 7-6(2) in a chak lo. Swiss star hian Covid-19 vangin US Open a khel lo a, hun rei taka hnua tournament a khelh lehnaah beisei a phak lo.

Hnehna changtu Musetti hi kum 18 mi chauh a la ni, ATP tour-ah chuan match pangngai pahnih an khelhna chauh a la ni hial - Italian Open main draw khel tur pawhin qualifying match pathumah hnehna a chan phawt a ngai.

Second round-ah chuan Musetti hian Kei Nishikori a hmachhawn leh ang. Japan tlangval Nishikori hi US Open khelh tum, mahse coronavirus a kai avanga inlan thei ta lo kha a ni - atan French Open inbuatsaihna a ni nghal ang.

Mipa singles inkhel dangah Denis Shapovalov leh Andrey Rublev te chuan an khingpui ve ve hnehin second round an inhlangkai. Clay court lalpa tia an sawi ṭhin Rafael Nadal pawh a inlan dawn a, tun hnaia chanchin ngah Novak Djokovic pawhin inelna hi a hmachhawn dawn a ni. 

Hmeichhe singles lamah Angelique Kerber chu Katerina Siniakova lakah 6-3, 6-1 in a chak lo nghal thung. German player hi US Open-ah pawh khan beisei phak loin last 16-ah a lo tla tawh bawk.

American tleirawl Coco Gauf erawhin hnehna a chang, player beiseiawm Gauf hi Ons Jabeur nen an inkhel a, set khatnaah 4-2 in hniam zawk hman mah se tho chhuak lehin 6-4 6-3 in a chak.