Villa tan Jack Grealish a vul

Aston Villa captain Jack Grealish-a'n Burton Albion lakah a club a chhanhim a, Pirelli Stadium-ah mualneitu Burton 3-1 in an lehthal. Villa tan Grealish-a'n goal ropui a khung bakah pound maktaduai 28 man Ollie Watkins-a'n goal a 

khung bawk.

League Cup second round-ah hian Burton-in bul an ṭan ṭha a, minute hnihna lekah Colin Daniel hmangin an khung. Hemi hnu hian Grealish-a'n a thiam thil rawn pholangin Villa innghahna a ni tih a rawn nemnghet.

Minute 39-naah Grealish hian fing zetin Neil Taylor a pe a, Taylor-a cross hi Watkins-a'n goal-ah a chantir. Villa history-a player manto ber Watkins hian Manchester United nen friendly match an khelh ṭum pawhin goal awmchhun a khung.

Amaherawhchu Watkins-a'n goal khung theihna hun ṭha dang a bawhpelh. Grealish-a'n corner flag bul aṭangin goalline hrulin ball a khalh lut a, player pahnih tlan pelin Watkins tan ball duhthusam pe mah se Villa striker hian crossbar pet per nan chauh a hmang.

Villa-in inkhel thunun hret mah se goal an khung lawk lo. Minute 88-naah corner aṭanga ball kal chu Grealish hian box pawn aṭangin ball-in lei a fuh hmain a volley goal a, Villa hmahruaina goal a ni bawk.

Inkhelh banah Aston Villa head coach Dean Smith chuan, "Jack Grealish chanchin hi an ziak nasa a, thuchiang erawh club dang aṭanga dawrna kan dawng lo. Villa-ah a cham dawn a, chu chu kan club leh a neitu tan chanchin ṭha a ni. Player theihna nei sang bik a ni a, cham a duh hi kan lawm takzet," tiin Manchester United nena sawi zawm Grealish-a'n contract thar a ziah chungchang a sawi.

Premier League club chak nemngheh nan Douglas Luiz-a'n injury time-ah a khung a, Villa 3-1 in an chak. Grealish te hian third round-ah Bristol City leh Northampton Town inkhela chak zawk an hmachhawn dawn a, September 21, Thawṭanni zan Premier League inkhelah Sheffield United an mikhual bawk ang.