RIO olympic 2016 Mittui nen Brazil an champion

Kum hnih liam taa an rilru na thawi damna Brazil-in an hmu ta - Nimin khan Olympic football final-ah Germany chu penalty-ah 5-4 in an hneh a, an ram chanchina a vawi khat nan Olympic football-ah gold an la ve ta.

Hun pangngaiah team pahnih 1-1 in an inhnehtawk a, penalty hmanga chak zawk zawn a ni. Germany-in an pet hmasa a, a pet hnuhnung bertu SC Frei-burg striker Nils Petersen a'n a pet goal loh hnuah Brazil tan Neymar a pen chhuak - Barcelona forward hian harsatna nei loa pet lutin mittui luang chhuak chungin an chak a lawm a, tu tan mah dem chi a ni lo.

Phuba chu

FIFA World Cup 2014 semi-final-ah Germany-in 7-1 in a thlengtu Brazil an sawp a, Neymar-a leh a hote tan nimin kha phuba lakna hun ṭha a ni. Inkhelh hmain Brazil coach Rogerio Micale-a'n World Cup-a inhmachhawn team nen an in an loh avangin phuba lam an ngaihtuah loh thu sawi mah se Brazil mipui rilruah 'phuba' bak a lang lo.

Inkhelh ṭan aṭanga minute 27-na lekah Neymar-a'n freekick hmangin goal ropui a khung nghal a, Marcana stadium-a mipui 78,000 thawm a ṭha hle - thawnthu thar ziahin a awm ngei dawn niin a lang a, 1984, 1988 leh 2012 Olympic football final-a tlawm Brazil mipuiten gold medal an mitthla.

Mahse, Germany-in awlsam taka tlawm an duh lo. First half-ah woodwork vawi thum zet an pet per a, goal chhuah lo Brazil an vannei. Minute 59-naah erawh German ral lianin Max Meyer hmangin an si phurh an sut ta nge nge a, hun tawp thlenga goal dang a luh loh avangin penalty hmanga chak zawk zawn a ni ta a ni.

Neymar-a lawmna

Kum 24 leka upa nichungin Neymar-a'n Barcelona tan club competition-a nomawi chawi theihna zawng zawngah a champion tawh a, Brazil tan vawi 70 inlanin goal 46 a khung tawh bawk - mahse, heng zawng zawng aia Neymar-a ngaihhlut chu Olympic gold medal a ni.

Brazil captain chuan, "Vawi-ina thil thleng hi ka nuna ka thil tawn tawh zinga ka ngaihhlut ber a ni a, chu aia fiah zawka sawi ngaihna chu ka hre lo," tiin a sawi a, Copa America hial a khelh loh nachhan Olympic-ah gold a awrh thei chu a hlim hle.

Neymar-a'n a lu ah '100% Jesus' tih hreng chungin gold medal a awrh a, keeper Weverton chuan, "He gold hi kan ta a ni a, a neitu dik tak erawh Pathian a ni. Pathian chuan Neymar a hmangaih ang chiahin kan vai hian min hmangaih a ni," tiin an lawmna niah pawh Pathian an theihnghilh lo.

Brazil coach Rogerio Mi-cale chuan, "Neymar hi kum 24 chauha upa a ni a, Olympic silver leh gold a nei tawh a, a hmabak awmchhun chu World Cup chiah a ni ta," tiin a sawi a, Barcelona forward lakah beiseina a nei sang hle.

Nigeria tan Bronze

Chelsea midfielder John Mikel Obi captain-na hnuaia khel Nigeria chuan Sadiq Umar goal hnih leh Aminu Umar goal khat hmangin Honduras chu 3-2 a hnehin bronze medal an dawng a, tukin zinga neih zawh tak Olympic-a an medal hmasa ber a ni.

John Mikel Obi chuan, "Kan thawkrim em em a, he team hi ka chhuang takzet a ni. Nigeria-ah football kan ngaihhlut em avangin kan tan chuan a hlu lehzual a ni. He bronze medal hi kan tan a ni a, kan chhungkaw tan a ni a, Nigeria tan a ni," tiin a sawi.