Hmeichhe volleyball champion China

China chuan Serbia chu 3-1 a hnehin Rio Olympic hmeichhe volleyball-ah gold medal an dawng a, pathumna inchuhnaah 2012 London Olympic silver medalist United States chuan Netherlands lakah 3-1 bawkin hnehna an chang ve bawk.

Inrinni zan inkhelah China hian set hma-sa ber hloh mah se set hnuhnung pa-thum-ah erawh chungnung zawk niin 19-25, 25-17, 25-22, 25-23 in hnehna an chang.

China hian 1984 leh 2004 khan gold an lak tawh bakah 1996 khan silver medal an lo la tawh a, ṭun ṭum hi an vawi thum champion-na chiah a ni. Hetih lai hian Serbia erawh Olympic final an vawi khat khelhna a ni a, tun hma lamin quarterfinal an la pel ngai lo.

China hmeichhe team coach Lang Ping hi player leh coach ni chunga Olympic champion thei hmasa ber a ni. Ping hian 1984 Los Angeles-ah khan player a nih laiin China hi a lo champion pui tawh a, tunah a hlawhtling leh ta chiah bawk.